Limitë na imigrancczich szkòlôków w Italsce

Zôkôz chùstów na gãbã, nôkôz nôùczi italsczégò i nié wicy jak trzëdzescë procent ùczniów na klasã – taczé zmianë wprowadzył italsczi rząd.

Italsczi rząd wëdôł dekret w sprawie òbchôdaniô sã z imigrancczima mniészëznama w szkòłach. Pòdôwczi pòzwôlającé na pòdjimniãcé decyzje na pòsedzenim Radzëznë Ministrów przedstawił minister pòùczënë Giuseppe Valditara: w italsczich szkòłach dô kòl trzëdzescë sztërë tësące klasów rozmajitëch stãpieniów, gdze szkòlôków cëzyńców je wicy jak trzëdzescë procent, w tim klasë wnet bez niżódnégò Italczika. Przédno tima cëzyńcama są ùczniowie z mùzelmańsczich krajów, jaczi trzimają sã swòji gôdczi ë swòjich zwëków twòrzącë tak pòzwóné klasë-getta. Rząd w dekrece wëdôł trzë przédné pòlétë. Zabronioné mô bëc w szkòłach noszenié bùrków i nikabów, chùstów do taceniô gãbë. W przëtrôfkù, czej starszi szkòłownika nie znają italsczégò jãzëka i nie wspiérają ùczeniô sã gò przez dzeckò, spòlëznowô òpieka mòże sczerowac starszich na jãzëkòwi kùrs abò zadecydowac ò przeniesenim dzecka bùten rodzëznowégò dodomù. Za złómanié zôkazu noszeniô chùstów czë òdmòwã nôùczi italsczégò grozy sztrôfa òd dwasta do tësąc eùro. Trzecy zapis wprowôdzô limit na lëczbã cëzyńców w jedny klasë: je to trzëdzescë procent szkòłowników. W òdpòwiescë na wątplëwòtë co do ti decyzje premiérka Giorgia Meloni skòmentowała na spòlëznowëch mediach, że ten limit nie zabierze szkòłownikóm z imigrancczich familiów mòżebnoscë nôùczi, bò pò wëfùlowanim limitu w jedny klase taczi szkòłownik bãdze sczerowóny do jinszi. To mô zagwësnic jich równy rozkłôd, zapòbiec pòwstôwaniémù klasów-gettów i pòzwòlëc na jawerną integracjã ë inkluzywnosc w procesu edukacje i socjalizacje z rówiesnikama.

H.S.Sz.