Ketaminowi pãcherz corôz czãstszi ù anielsczich dzecy

Ketamina stôwô sã trzecą nôpòpùlarniészą ùżiwką w Anielsce ù dzecy. Je tónô i nie je nót wiôldżich dôwków, żebë zaczãła dzejac.

W maju bòlëca Alder Hey w Liverpoolu òdemknãła pierszą w Zjednónym Królestwie dzecną klinikã lékarzeniô ùropatie sprawiony przez ketaminã. Lékarzëlë ju tam przeszło setkã dzecy, z czegò nômłodszich trzënôsce lat stôrëch. Wiele z nich przëjimô ketaminã òd wicy jak rokù. Ten chemiczny związk je wëzwëskiwóny w anestezjologie do znieczuleniów i narkòzë, a téż do lékarzeniô depresje. Mòże sprawiac rozmajité narkòticzné efektë òd rozlóznieniô przez halucynacje pò pòwôżné zatrëcé. Mô òna òsoblëwie lëchi cësk na piszny ùstôw, sprôwiającë zestôwk symptomów zwóny „ketaminowim pãcherzã”. Pacjencë nie trzimią pãcherza, mùszą piszac czãscy jak zwëczajno, mô to sã rzeszëc ze stolëmnym bólã przëmiérzónym do przecyskaniô przez ùstôw tłëczonégò skła. Sóm pãcherz tracy swòje bënowé òchronné szëchtë, a szczënë nabiérają kònsystencje cała gladisë. Syndróm dotikô téż jinëch òrganów i sprôwiô ból w całi dolny partie cała. Wedle pòdôwków britijsczich badérów ketaminowi pãcherz dotikô trzë na dzesãc regùlarnëch brëkòwników ketaminë. Prowadniczka kliniczi profesórka Rachel Isba taksëje, że dzysdnia ù dzecy w Anielsce ketamina stôwô sã trzecą nôpòpùlarniészą ùżiwką, pò alkòholu i marihuanie. Je òna dosc tónô, przëstãpnô za tipiczné czeszenkòwé, a do ùdostaniô efektu sygają môłé dôwczi. Czãsto decydëją sã brac ketaminã prawie na ból sprawiony ùprzédnyma dôwkama, co jesz zwiksziwô jiwer. Pacjentóm drãgò je òprzestac zażëwac narkòtik, jeżlë jich nôblëższé òkrãżé drëchów téż zażiwô. Wëszëznë kliniczi pòdôwają, że ji pacjencë czãsto mają spróbòwóné téż jinëch ùżiwków. Ketamina w Zjednónym Królestwie mô status narkòtikù klasë B, tak jak amfetamina czë marihuana. To dô równak głosë, żebë przeniesc jã do nôgrozniészi klasë A, w jaczi są na przëmiar kòkajina i herojina – za przesprawë zrzeszoné z tima narkòtikama grożą wikszé sztrôfë i są òne pòddóné òstrzészi kòntrolë.

H.S.Sz.