Wërok za zabicé i ùsztélowanié wëpôdkù

Akt òbskôrdżi prokùratura w Kartuzach wëdała łoni w séwnikù. Sprawa ju je rozrzeszonô, a sprôwca dostôł òstrą, ale nié nôòstrzészą sztrôfã.

Òkrãgòwi Sąd we Gduńskù w pòniedzôłk ósmégò gòdnika wëdôł wërok w sprawie chłopa sądzonégò ò zabicé białczi i pòdłożenié aùtoła z ji całã na banowi przejôzd w Mézowie w gminie Kartuzë. Tam dzesątégò stëcznika łoni bana relacje Kartuzë - Gduńsk Wrzeszcz grzimnãła w aùtół, w jaczim na placu czerowcë nalezlë miartwą białkã. Z zôczątkù bëło gôdóné ò wëpôdkù w jaczim białka miała zdżinąc, ale dzãka chùtczim przezérkóm pòjazdu w bagażnicë òdkrëlë płachce krëwi. Pò dalszim badérowanióm doszlë do dbë, że białka w sztóce grzimniãcô mùsza ju nie żëc. Wedle prokùraturë Tomôsz K. miôł òstro pòsztridac sã ze swòją białką w ji kòsmeticznym salonie w Kôłpinie. Bëlë w rozdënkù, a chłop ni mógł sã pògòdzëc z tim, że jegò białka nalazła so ju nowégò partnéra. Czej òna chca zwònic na pòlicjã, òbskôrżony jednôsce razy łãpnął jã w głowã specjalno wzãtim młotkã, co doprowadzëło do ji smiercë. Tłómacził sã pòtemù, że młotkã miôł ùdbóné znikwic ji aùtół, ale sąd temù nie dôł wiarë i ùznôł, że mòrdarstwò bëło zaplanowóné. Pòtemù sprôwca wsadzył cało swòji białczi do bagażnicë aùtoła, w jaczim jã przewiózł na banowi przejôzd w Mézowie, a tej przesadzył jã na plac czerowcë żebë ùsztelowac ji smierc w wëpôdkù aùtoła z baną. Òb czas wëdowiédzë przesprôwca z zôczątkù gôdôł, że nie pamiãtô dokładno całégò zdarzeniô a téż próbòwôł ùdawac niedoczëniałégò, le w kùńcu przëznôł sã do mòrdarstwa i scwierdzył, że ni ma gòdzënë, żebë ni żałowôł. Za zabicé białczi a téż za sprawienié direktny zagrôżbë katastrofë w lądowi rësznoce sąd skôzôł gò na dwadzesce szesc lat sôdzë. W dodôwkù mùszi zapłacëc w sëmie szescset tësący złotëch dlô nôblëższich krewnëch białczi, dzesãc tësący dlô Fùnduszu Pòmòcë Pòkrziwdzonym, a téż jednôsce tësący na ùprawienié ùszkòdów pò wëpôdkù. Prokùratura chcała dlô niegò dosmiertny sztrôfë.

H.S.Sz.