Reklama

Strzélôł w zôkładze ùbezpieków i sądze

Klëka

29/04/2026 18:54

Òdj. Dimboukas; zdrzódło: https://pl.wikipedia.org/wiki/Ateny#/media/Plik:View_of_Athens_from_Lycabettus.jpg

Atakòwnik je krótkò przed dzewiãcdzesątką, robił w firmie zbiérający smiecë. Mést ni miôł ùdbóné nikògò zrenic, ale piãc òsób bëło do szpitalów jachóné.

We wtórk dwadzestégò ósmégò łżëkwiata w Aténach òsmëdzesąt dzewiãc lat stôri chłop wlôzł do bùdinkù zôkładu spòlëznowëch ùbezpieków z flińtą. Strzélôł w pòdłogã, reniącë òdłómkã jednégò robòtnika. Pòtemù zwiornął taksówką do bùdinkù sądu, tam wlôzł do jednégò z biórów, gdze skłôdają procesowé pismiona. Tuwò zôs strzélôł z flińtë w pòdłogã, a òdłómczi pòlecałë na sztërë białczi. Pò tim zwalił z pòlëców czile teczków i rzekł, że tam je òdpòwiesc na pitanié, dlôcze to zrobił. W sądze òstawił swòjã flińtã i tasze do gazétów, a tedë ùcekł piechti. Pòlicje ùdało sã gò nalezc w gòscyńcu w Patras, dwasta kilométrów òd grecczi stolëcë, gdze pòjachôł aùtobùsã. Tam téż miôł kòl se długą barniã. Szandarzë gò aresztowelë. Zrenioné przez niegò òsobë nie bëłë w zagrôżbie żëcégò, ale zawiezlë je do bòlëców. Atakòwnik to robòtnik zakładu òcziszczaniô gardu z òkòlégò Aténów. Mòtiwù atakù media jesz nie pòdałë. Jedna z agencjów dała leno do wiadë, że òsmë lat nazôd òn przechôdôł psychiatriczné lékarzenié.

H.S.Sz.

Czytaj nas w Google

Dodaj do Google

Źródło i opracowanie własne