Reklama

Białka na pòstãpną wódckã Nordowi Kòreji

Klëka

12/09/2026 15:32

Kim Dzong Un. Òdj. Mil.ru; zdrzódło: https://en.wikipedia.org/wiki/Kim_Ju_Ae#/media/File:Kim_Jong-un_and_Vladimir_Putin_(2023-09-13)_12_(cropped).jpg

Ò żëcym Kim Dzu Ae nie je wiedzec za wiele, ale wëdowiédzô z Pôłniowi Kòreji je przekònónô, że òjc prawie jã widzy na swòjã nastãpniczkã.

Rząd Nordowi Kòreji ò jistnienim Kim Dzu Ae dôł do wiadë w dwa tësące dwadzestim drëdżim rokù. Je to córka Kim Dzong Ùna i jegò białczi Ri Sol Dzu, z jaką je żeniałi òd sétmënôsce lat. Dokładny wiek jegò córczi i drobnotë co do ji wësztôłcenia czë priwatnégò żëcô nie są znóné, ale je jã widzec kòl òjca òb czas państwòwëch ùroczëznów czë òbezdrzënów wòjskòwégò sprzãtu. Rządowé media òficjalno nazéwałë jã „òsobą namienioną do rządzeniô”. Przez to òbzérnicë nordowòkòrejsczi pòliticzi docygają, że òjc ju jã wëbrôł na swòjã nastãpniczka. Òstatno pòstacje Kim Dzu Ae przëzdrzałë sã służbë wëdowiédzë Pôłniowi Kòreji. Dotąd bëłë dbë, że Kim Dzon Ùn mòże miec troje dzecy, a nôstarszi to syn. Terô zaktualizowałë te infòrmacje. Pòdałë, że dérëje proces przërëchtowaniô Dzu Ae do òbjimniãcô włôdzë pò òjcu. Na gwës mô òna młodszich bracy czë sostrë, a jeżlë nawet nie je òd nich nôstarszô i dôwni docygóny pierwòrodny syn wódcë jistnieje, to nie je òn nijak pòmëslóny na jegò nastãpnika. Tej Dzu Ae mòże bëc pierszą białką przewòdzącą Kòrejsczi Lëdowò-Demòkraticzny Repùblice. Dotąd òd ùsadzeniô państwa w tësąc dzewiãcset sztërdzestim ósmim rokù włôdza przechôdała z òjca na sëna. Pò wiecznym prezydence Kim Il Sóngù wódcą òstôł jegò nôstarszi syn Kim Dzong Il, a pò Kim Dzong Ilu jegò trzecy syn Kim Dzong Ùn.

H.S.Sz.

Źródło i opracowanie własne