Reklama

Òddzãkòwanié z Merkatorã

Klëka

06/09/2026 12:49

Òdj. https://upload.wikimedia.org/wikipedia/commons/6/61/Equal_Earth_projection_SW.jpg?utm_source=commons.wikimedia.org&utm_campaign=index&utm_content=original

Wnet piãc stalatów brëkùjemë przedstawieniów naszi planétë, na jaczich w òbjim Kanadë, Rusczi czë nawet sami Grenlandie zmiescy sã całô Afrika abò Pôłniowô Amerika.

Òglowé Zgromadzenié Òrganizacje Zjednónëch Nôrodów zadecydëje, czë zabédowac òddzãkòwanié sã z projekcją Merkatora na dobré. Chòdzy ò sztandard ùsôdzaniô landkôrtów swiata wedle projektu flamandzczégò kartografa Gerarda Merkatora, jaczi żił w szestnôstim stalatim. Jegò kôrta miała służëc żeglarzóm, dlôte ùchòwóné w ni bëłë nórtë pôłników i równoleżników, ale przez to wiôlgòsc lądu bëła zabùrzonô – czim dali òd równika, tim barżi rozcygnioné kòntinentë. Òd czasów Merkatora ùsadzoné bëło wiele jinszich mòdłów projekcje. Projekcjô Merkatora wcyg biwô równak wëzwëskiwónô przez nieswiądnëch jiwrów wëdôwców kôrtów czë edukacjowëch materiałów. Projekt ùchwôlënkù Òrganizacje Zjednónëch Nôrodów w ti sprawie wniosło Togò ze wspiarcym Afrikańsczi Ùnie. Prawie Afrika na projekcje Merkatora cerpi nôbarżi, bò wëzdrzi na mniészą òd Grenlandie. Aùtorzë peticje ò zmianã swiatowégò sztandardu kôrtów przëbacziwają, że w Africe szłobë zmiescëc Zjednóné Stanë, Chinë, Indie, Japòniã, Meksyk i machtny dzél Eùropë, a jesz bë òstało placu. Ù Merkatora nijak ni ma tegò widzec, co wedle przëstojników zmianë ùmòcniwô mëslenié ò Africe jakno ò mało znaczącym teritorium. W projekce ùchwôlënkù je bédënk, żebë òdtąd w szkòłach czë ùczbòwnikach wëzwëskiwac òbrobioną w dwa tësące òsmënôstim rokù projekcjã Equal Earth – projekcjã Równy Zemi, jakô rzetelno òddôwô wiôlgòsc lądu i łôtwie pòzwôlô òbrechòwac fakticzné dalecznoscë.

H.S.Sz.

Źródło i opracowanie własne