Reklama

Grozny wëpôdk na Gduńskù Lëpcach

Klëka

06/09/2026 12:54

Òdj. z facebookòwi starnë: KM PSP Gdańsk

Służbë przëbacziwają, że czej ju sã ùtôrknie na przejezdze, szlabanë mùszi wëłamac. Są wiele tóńszé jak aùtół, bana, a ju w òglim lëdzczé żëcé.

We czwiôrtk trzecégò séwnika we Gduńskù pò pierszi pò pôłnim na przejezdze kòl pòżdôwkù Gduńsk Lëpce bana grzimnãła w cãżarowi aùtół. Czerowca, òbëwatel Bòsnie i Hercegòwinë, wjachôł na przejôzd. Czej ju równak przejéżdżôł przez sztrékã, szlabanë jãłë sã òpùszczac, a òn próbòwôł sã jakòs ùstawic. Swiôdkòwie delë mù znac, że mô wëłamac szlabanë i nëkac z przejazdu, le òn jich doradów nie wëzwëskôł. Retëjącë sã przed nadjéżdżającą baną Intercity do Zelony Górë, czile sekùnd przed grzëmã zjachôł kabiną ze sztreczi i nadstawił naczepã, chtërna òstała cawno znikwionô. Ùszkòdë bëłë téż w sami sztrece i w czole bane, wkòl jaczi paka sã zawinãła. Béł to nowi skłôd. Nicht równak nie zdżinął. Do bòlëcë na badérowania zabrelë maszinistã i czerowcã aùtoła. Òbaji bëlë trzézwi. Wëpôdk sprawił wiôldżé òpózdnienia w rësznoce banów na Pruszcz, nawet pò dwie gòdzënë. Czej ju rëgnãłë, pùszczelë je przez Òlszinkã. Rësznotã banów znowilë pò dzesąti wieczór. Winien béł czerowca, jaczi nie bôcził na widë STOP na przejezdze. Swiôdkòwie wskazéwają równak, że ne szlabanë mają zgrôw do pózdnégò òpùszczaniô sã. Ju w piątk reno na tim samim przejezdze ùtôrknął òsobòwi aùtół, jaczégò czerówcka téż nie czerowała sã za widama. Tu równak swiôdkòwie wëłómelë szlabanë, a aùtół zdążił zjachac ze sztreczi, niglë bana przejachała.

H.S.Sz.

Źródło i opracowanie własne