Reklama

Samòta japòńsczi premiérczi

Klëka

27/08/2026 14:12

Sanae Takaichi. Òdj. 首相官邸ホームページ; zdrzódło: https://pl.wikipedia.org/wiki/Sanae_Takaichi#/media/Plik:Sanae_Takaichi_20251021.jpg

Spi przewôżno do trzech gòdzyn na dobã, robi w weekendë, kôrmi jã chłop, wespółrobòtników wkòl se miec nie lëdô.

Òd òbjimniãcô ùrzãdu łoni w rujanie premiérka Japónie Sanae Takaichi dała sã pòznac jakno robòcô i sómnô białka. Wikszosc robòtë wëkònywô nié w biórze premiérë, le w swòji rezydencje, gdze nôczãscy trzimô kòl se blós swòjégò chłopa, jaczi warzi jestkù, i jednégò asystenta. W wëdowiédzach przëznôwała, że mô starã angażowac jak nômni lëdzy wkòl sebie. Takaichi rzôdkò sã pòjôwiô na sesjach parlamentu, zetkania swòjégò gabinetu zwòłiwô rzedzy jak chtërenlebądz òd wczasniészich premiérów. Robi w weekendë. W lëpińcu pòchwôlëła sã, że pierszi rôz, òd czedë je premiérką, ùdało ji sã wëżorgac piãc gòdzyn nieprzerwónégò spikù. Terô w swòjich spòlëznowëch mediach wstawiła seriã pòstów òpisywającëch ji codniowé żëcé w rezydencje w dzélnicë Nagata-cho w Tokio. Bùdink je znóny z gôdków ò ùkôzkach, jaczé tam mòże pòtkac, midzë jinszima dëchach pòzabitëch ùrzãdników, jaczi przódë lat mielë tam swòje bióra. Premiérka przëznała, że ùkôzków niżódnëch nie pòtkała, ale rôz pò pòdłodze przebiégł ji kòl nodżi frãcuz, i to nimò ji wiôldżi starë ò czëstosc w jizbach. Widzała gò czile razy, ale gò nie zabiła. Przëznała, że jakno młodi dzéwùs przeczëtała mangã Òsamù Tezuczi „Fenyks” i òd te czasu òstôwô w ni mòcnô wiara w reinkarnacjã. Mia tej nôdzeja, że frãcuz, jaczi mógł bëc wcelenim jaczi to wanożący dëszë, sóm òdéńdze. Czej równak òpòwiedzała rôz nôleżnikòwi swòjégò gabinetu ò òwadze, ten rzekł, że zarô sã nim zajmie. Frãcuz znikł. To premiérce dało pòczëcé zeldżi, ale téż smùtkù ë znôwny samòtë.

H.S.Sz.

Źródło i opracowanie własne