Co? Dze? Czedë? [27-31.05]

29.05 (piątk) ò 6 p.p. w Mùzeum Kaszëbskò-Pòmòrsczi Pismieniznë i Muzyczi we Wejrowie bãdze Kaszëbsczi Pòeticczi Slam. Mdze to ju III edicjô tegò kònkùrsu. Je òn òrganizowóny przez absolwentów kaszëbsczi etnofilologie i wspòmnióné Mùzeùm.

Slam to "biôtka na wiérztë", dze òbsãdzëcelã je całô pùblika, jakô wëbiérô w demòkraticznëch welacjach dobiwców. Ùdzél mòże wzyc kòżdi, chto mô nômni 16 lat i przërëchtowôł wiérztë w kaszëbsczim jãzëkù. Na slam mùszi sã zapisac. Wëfùlowóné papiorë ze zgłoszenim wësélómë na maila: [email protected] do 25 maja (mòżna je nalezc na starnie Mùzeum). 

28.05 (czwiôrtk) ò 5.30 p.p. w szkòle w Gniewinie òstónie ùsadzony part Kaszëbskò-Pòmòrsczégò Zrzeszeniô. Prôwdã gôdającë KPZ w Gniewinie jistniôł wiele lat, równak w slédnym czasu przestôł òn dzejac. Wôrt wzyc ùdzél w tim wëdarzenim. Mómë nôdzejã, że òdroda partu KPZ bãdze pòdskacënkã, jaczi rozbùdzy zainteresowanié kaszëbizną w òkòlim. Wszëtczich czëtińców z gniewińsczich strón (i nié leno jich) rôczimë do zapisaniô sã do òdrodzonégò partu. 

27 maja (strzoda) ò 5.30 p.p. w Ksążnicë prof. Gerata Labùdë we Wejrowie bãdze aùtorsczé pòtkanié z Aną Kwasniewską i ji ksążką „Wielokulturowe Pomorze Gdańskie od połowy XIX do pocz. XXI w. – struktura etniczna i jej przemiany, kultury regionalne, tożsamość". Ksążka pòrësziwô témã taczich grëpów, jak: Kaszëbi, Bòrowiôcë, Kòcewiôcë, Krajniôcë i Kòsznédrowie, a téż Miemcë, Żëdzë czë Ùkrajińcë. Mòżna bãdze sã doznac ò historicznëch pòzmianach w etnicznëch strukturach. Doswiôdczenia te nie są wôżné leno dlô historie, ale téż pòkazëją, co dzeje sã dzysô i jak mòże wëzdrzec przińdnota. 

28 maja (czwiôrtk) ò 5 p.p. w Klubie Miejsczi Biblioteczi w Lãbòrgù mdze promòcjô ksążczi „Z Sybiru do Lëzëna" Sztefana Fikùsa. Ksążka òpòwiôdô ò historiach Kaszëbów, jaczi òb czas I Swiatowi Wòjnë trafilë do rusczi niewòlë. Ò ksążcë i ji aùtorze mdze mòżna sã wiele dowiedzec òd Daniela Kalinowsczégò. Do te wëstąpi karno Frantówka.

31 maja (niedzela) zaczinô swój sezón Kaszëbskô Liga Bùczczi. Pierszé miónczi bãdą w Mòjszu òd 11 d.p.

Wcyg jesz jidze sã zapisac i zachãcywómë do te. Sygnie trzëpersonowé karno i chãcë do grë. Czidlôczi mdą mielë przërëchtowóné òrganizatorzë, tej ni mùszita sã jiscëc ò felënk sprzãtu. Nawetka jeżlë ni mòżesz zebrac karna, a chcesz grac, to rôczimë do Mòjusza i mdze mòżna doparłãczëc chòcbë do Spòrtowégò Karna Pòmòraniô.