Zjôzd repùblikanów w Dallas

Scepticë, téż z sami Repùblikańsczi Partie, pòzwelë rozegracjã „Trumpapaloozą”. Sóm prezydent miôł wiôlgą starã przekònac przëstojników do ùdzélu we welacje.

W smùtanie Amerikanie bãdą wëbierac skłôd Jizbë Reprezentantów i jedny trzecy Senatu w tak pòzwónëch pòłówkòwëch welacjach, òrganizowónëch w pòłowie kadencje prezydenta. Z ti leżnoscë Partiô Repùblikanów zòrganizowała generalny zjôzd w Dallas, w Teksasu, we strzodã i czwiôrtk dzewiątégò i dzesątégò séwnika. Zwëczajno amerikańsczé partie ùrządzają swòje kònwencje w rokù prezydencczich welacjów, tej ten kraczôj ze starnë repùblikanów béł ùznóny za òsoblëwi. Nimò wiôldżich zôchãcbów na zjôzd wiele wôżniészich pòstacjów partie nie przëjachało i dało sã skùpic na kampanie w gwôsnëch òkrãgach. To przez wësoczi kòszt dwadzesce piãc tësący dolarów dlô kandidatów za wëstąpienié, a téż przez spôdającé pòpiarcé dlô prezydenta Donalda Trumpa, wedle badérowaniów dzysdnia mni jak sztërdzescë procent. Trump, chòc w welacjach do Kòngresu nie bãdze brôł ùdzélu jakno kandidat, na zjezdze zgromadzył nôwicy ùwôdżi. Zachãcywôł przëstojników swòji partie do solidarnégò ùdzélu w welacjach i welowaniô na ji kandidatów. W òba dni zjazdu rzekł, że jeżlë repùblikanie ùtrzimają wikszosc w kòngresu, zażorgô ò wëpłatã piãc tësący dolarów dlô kòżdégò ùstnégò Amerikana. Przestrzégôł, że demòkracë prowadzą krôj w czerënkù kòmùnizmù, a latosé welacje bãdą biôtką dobrégò ze złim. Bôczącë na dosc nisczé wëniczi frekwencje na pòłówkòwëch welacjach, w drëdżim dniu zjazdu zachãcywôł téż przëstojników do przësëżeniô, że pùdą do ùrnów i zawelëją na repùblikańsczich kandidatów tak, jak zawelowelëbë na niegò. Na kùńc òstrzégł téż, że jeżlë w welacjach ùdzélu nie wezną, to pùdą do piekła, a òn nie chce, żebë to sã jim stało.

H.S.Sz.