Gdze trafi „Dôr Młodzeżë”?

Òkrãtu chce miasto Szczecëno i jegò żeglarsczé òkrãżé. W Gdinie dô za to głosë, żebë gò sobie òstawic, ale prezydentka jesz pò niżódny starnie nie stanãła.

Żeglôcz „Dôr Młodzeżë” òd łżëkwiata je na rejsu do Zjednónëch Stanów. Chòc je ùdbóné wëzwëskiwac gò jesz przez czile lat, mòże to bëc òstatnô tak długô réza tegò ùczbieniowégò òkrãtu Mòrsczégò Ùniwersytetu we Gdinie. Ni ma zgòdë co do tegò, co mô z òkrãtã sã stac, jak òn ju skùńczi służbã. Szczecyńsczé żeglarsczé strzodowiszcze chce, żebë òkrãt stanął w pòrce we Szczecënie. Za tim béł Klub Kapténów Wiôldżi Żeglôrczi pòd prowadnictwã kapténë Włodzmierza Gricnera a téż Stowôra Mòrsczé Miasto Szczecëno. Dzãka jich lëstóm inicjatiwã przekôzaniô „Daru Młodzeżë” stolëcë zôpadnopòmòrsczégò wòjewództwa pòpiarł téż prezydent miasta Pioter Krzistk. Kapténa Gricner, chtëren prowadzy kampaniã w ti sprawie, gôdô, że zôpadnopòmòrsczé przez lata òddôwało swòje historiczné òkrãtë do Trzëgardu i biwało niesprawiedlëwie traktowóné. Szczecëno czëje sã z „Darã Młodzeżë” baro sparłãczoné, a Gdiniô mô doch ù se „Dôr Pòmòrzô”. We Gdinie za to dało peticjã do prezydentczi Aleksandrë Kòszork ò to, żebë zagwësnic òstawienié żeglôcza w tim gardze. Òd maja przez tësąc òsób sã pòd nią pòdpisało, a wëszedł z nią wiceprowadnik Radzëznë Gardu Jakùb Ùbrich. Ten gôdô, że decyzjô ò òstawienim tak wôżnégò òkrãtu w Gdinie bëłabë wôżnym gestã w rokù fejrowaniô ji setnégò gebùrstachù. Peticjã chce złożëc na przełómanim séwnika i rujana. Miéwcą òkrãtu na dzysdzéń òstôwô Mòrsczi Ùniwersytet we Gdinie i to òd jegò wëszëznów mdze zanôlégało, co z „Darã Młodzeżë” sã stónie. Rzeczniczka ùczbòwnie Zuzana Szwédk-Kwiecyńskô rzecze, że Szczecëno jesz sã z nima w ti sprawie nie kòntaktowało, ale bënë ùniwerystetu dérëją analizë ti sprawë. Na dzysdzéń ùczbòwniô widzy wërazny związk òkrãtu z miastã „z mòrza i rojeniów” i bãdze to dlô ni wôżny dzejnik w pòdjimanim decyzje.

H.S.Sz.