Co? Dze? Czedë? [21-24.05]

24 maja (niedzela) w Brusach mdze do òbezdrzeniô widzawiszcze teatrowégò karna Kaszëbskô Bina "Kwasné gùrczi" na spòdlim dokazu Darka Majkòwsczégò w reżiserie Łukasza Sajnaja. Mdze kąsk do smiéchù, ale téż na kùńc dokôz zachãcywô, żebë wezdrzec na ralacje w najich familiach. Chòc pò titlu mòżeta sã spòdzewac sã letczi histori, to sztrid, do jaczégò dochòdzy, je wnet dosłowno smiertelno pòwôżny. 

Ju 23 maja (sobòta) w Mùzeum Lëdowi Kùlturë Pòmòrzô w Swòłowie są sparłãczoné dwie rozegracje: VIII festiwal fòlkloristicznëch karnów "Zemia Słëpskô" i Szparagòwé Swiãto. Dobré jestkù i mùzyka w pòmòrsczim wëdanim - co wicy je brëkòwné dlô człowieka? Szparadżi mdą w kòżdi mòżlëwi pòstacje: prażoné, piekłé, grilowóné, warzoné i w zupie. Mdą lëdowi wëstôwcë z rãkòdzełã, mùzyczné kapele, kùlinarné warkòwnie dlô dozdrzeniałëch i warkòwnie dlô dzôtk. Rôczimë òd 12 w pôłnié do 7 p.p. do zôgardów nr 14 i 15.

Jesz przed sobòtą w Swòłowie bãdze so dzejało. 21-22 maja (czwiôrtk-piątk) bãdze Òglowòpòlskô Nôùkòwô Kònferencjô "Lëdowé Zdrzódła Kùlturë". Edicjô III: Teater. Dlô lubòtników teatru to bëlnô leżnosc, cobë tim razã so pòtkac nié na widzawiszczu, ale na wëkładach z teòrie teatru. Mdzeta mòglë lepi pòznac taczi pòstacje jak Ana Łajming, Paùel Szefka czë patrónka latoségò rokù Róża Òstrowskô. Jeżlë chtos jesz nie widzôł filmù "Jo" nagrónégò przez Regionalny Dramaticzny Teater z Lëzëna, to w czwiôrtk ò 5 p.p. mdze òn pòkôzóny, a pòtemù aktorzë òdpòwiedzą na pitania zadôwóné przez pùblikã. Dlô cekawëch, jak lëdowi teater rozwijô sã w jinszich môlach Pòlsczi, mdą téż wëstąpienia ò Górnym Sląskù i Wiôlgòpòlsce. 

24 maja (niedzela) w Zbichòwie bãdą Kaszëbsczé Zeloné Swiątczi. Je to baro wëjątkòwô rozegracjô, bò je to jedurnô leżnosc, cobë ùzdrzec kaszëbsczi zwek "Pôlenié Sztrómana". Béł òn czedës znóny w wiele placach, równak dzysô mòżna gò pòtkac leno w Zbichòwie, dlôte tim barżi mileczno roczimë, cobë pòznac naji stôri zwëk, a téż achtnąc bëlną robòtã wszëtczich, co mają ò niegò starã. Mdze téż wiele jinszich atrakcjów: Kabaret Kùńda, Kabaret Pùrtcë, Karno na Dobrą Nótã, dmùchańcë dlô dzôtk i jôda zrëchtowónô przez OSP i KGW ze Zbichòwa.