Reklama

Czerowca drëkòwôł dzecóm specjalné bilietë

Klëka

16/09/2026 18:10

Projektë zrobioné przez czerowcã bëłë prosté, ale dzecë a jich starszi dowôrtnilë mileczny gest. Na emeriturã pòszedł z dzecnym dokazã wdzãcznotë.

Mieszkónka gminë Kòsôkòwò pòdzelëła sã w spòlëznowëch mediach historią jednégò czerowcë aùtobùsów. Robił òn na linie 146 Zarządu Miesczi Kòmùnikacje we Gdinie, jakô prowadzy przez gminã Kòsôkòwò midzë Gdinią a Réwą. Jeden starszi czerowca przez wicy jak rok rozdôwôł nômłodszim pasażéróm môłé cedelczi. Bëłë na nich wëdrëkòwóné kònturë pòstacjów z bôjków czë jinszé òbrôzczi a téż nôdpis na strzélce „Tu kasowac”. Nie bëłë to prôwdzëwé bilietë, a blós drobné darënczi. Te dzecóm sã baro ùwidzałë, zaczãłë nazewac czerowcã „wastą òd bilietów”. Mieszkónka gminë òpòwiedza, że jednégò razu, czej wëchôdała z córką z aùtobùsu, nen czerowca je zatrzimôł, pòwiedzôł że kùńczi robòtã, bò jidze na emeriturã, a tej dôł białce pendrive'a. Rzekł, jaczim pózdni kùrsã bãdze jachac, żebë mògła mù nen pendrive òddac. Białka wrócëła z córką dodóm, òdtwòrzëła nosëdło i nalazła na nim wszëtczé projektë darënkòwëch bilietów zrobioné przez czerowcã. Zgrała je dlô córczi na swój kómpùter, a dzéwczã zrobiło dlô czerowcë laùrkã. Matka z córką pòszłë na slédny pòżdôwk stôrégò szoférë, pendrive'a z laùrką mù òddałë, a tej òddzãkòwałë sã z nim. Na drëdżi dzéń chłop béł ju emeritã.

H.S.Sz.

Załączniki