Reklama

Co? Dze? Czedë? [1-3.05]

Klëka

30/04/2026 12:35

1 maja jak rok w rok w Klëkach bãdze „Czôrné Wieselé”. Je to pòkôzënk, jak czedës żëlë Słowińcë. Mòżna bãdze ùzdrzec jich codniową robòtã, jak pranié, maglowanié, robienié i ùprôwianié séców, przãdzenié niców, pieczenié waflów, robienié masła czë wëplôtanié kòszów. Mdze téż leżnosc do kòpaniô torfù.

To prawie wkół torfu rozgriwô sã całô rozegracjô. Mdze mòżna na placu pòtkac wiele lëdowëch artistów i pòsłëchac mùzycznëch karnów. Jeżlë wa miała w planach òbezdrzec skansen w Klëkach, to je to nôbëlniészô leżnosc w całim rokù na taką wanogã. Całé wëdarzenié mdze dérowało òd 10 dp. do 4 pp.

Reklama

Jeżlë Czôrné Wieselé to mdze dlô waju za mało abò za dalek, to òd 1 do 3 maja w gòdzënach 10 dp. –6 pp. Mùzeùm – Kaszëbsczi Etnograficzny Park we Wdzydzach dlô swòjich gòscy mdze miało przërëchtowóné wiele atrakcjów. Kòżdégò dnia ò 12. mdze Pòchód z Môjikã i widzawiszcze „Ùroczi Czarostwa” przërechtowóné przez Teater Zymk. 1 maja ò 2.30 pp. mdze pòtkanié ò Różë Òstrowsczi patrónce rokù 2026, ò 4 pp. mdze mòżna wiele sã dowiedzec ò tobace. Na 2 maja ò 3 pp. Je przërëchtowónô prelekcjô ò jałówcu. 3 maja ò 3 pp. bãdze przërównanié kaszëbsczich wierzeniów z tima, jaczé pòtikómë westrzôd jinszich Słowianów. Mdze mòżna wząc ùdzél w warkòwnie z malowaniégò na szkle, tkaniô i robieniô kwiótków z papioru.

Reklama