Reklama

Premiérka Duńsczi przeprosëła grenlandzczé białczi za przëmùsową antikòncepcjã

Klëka

26/09/2025 11:01

Nuuk, stolëca Grenlandzczi. Aùtór: Quintin Soloviev; zdrzódło: https://pl.wikipedia.org/wiki/Nuuk#/media/Plik:Nuuk,_Greenland_skyline_aerial_view.jpg

Wedle wskôzaniów rapòrtów nawet pòłowa białków w rozrodczim wiekù mògła bëc òbjimniãtô tima dzejaniama.

We strzodã dwadzestégò czwiôrtégò séwnika premiérka Duńsczi Mette Frederiksen w Nuukù, stolëcë Grenlandie, w miono duńsczégò rządu złożëła przeprosënë grenlandzczim białkóm za stosowanié przëmùsowi antikòncepcje w célu kòntrolë ùrodzeniów na òstrowie. Na znak żalu miała założony czôrny kléd, a w przemówienim mówiła ò mùszebnoce òdemkniãcô nôcemniészich dzélów historie. Za przeprosënë pòdzãkòwôł téż na czôrno òblokłi premiéra Grenlandie Jens-Frederik Nielsen i Naja Lyberth, przédniczka kampanie wzéwający duńsczi rząd do wëpłatë szkòdowaniô dlô Grenlandie. Wedle nich, przeprosënë òd Frederiksen stwòrzëłë rum dlô grenlandzczich białków, żebë mòc przerobic pòspólną traùmã. Midzë tësąc dzewiãcset szescdzesątim szóstim a tësąc dzewiãcset dzewiãcdzesątim pierszim rokã na pòlét rządu lékarze na Grenlandie pòwszechno zakłôdelë nôscelatkóm i młodim białkóm bënëmacëczné wkłôdczi, colemało bez zgòdë a nawetka wiédzë jich samëch a téż jich starszich. Brëkòwóny béł przez wikszosc czasu le jeden tip wkłôdków, w za wiôldżim rozmiarze, a to colemało rodzëło zdrowòtné jiwrë a nawetka ùszkòdzenié rodnégò ùkładu. Wedle dochôdaniô przeprowadzonégò w tim miesącu do tësąc dzewiãcset sétmëdzesątégò rokù tą praktiką òbjimniãté bëło sztërë tësące sétmëdzesąt dzéwczãt i białków – kòł pòłowë białków w rozrodczim wiekù na òstrowie, co przeniosło sã na spôdk wielënë ùrodzeniów ò pòłowã. Skala tëch dzejaniów w pòstãpnëch latach jesz je badérowóné.

H.S.Sz.