Reklama

Dzewiãc dni szëkbë za wôłkã

Klëka

22/04/2026 11:39

Szari wôłk. Pòzdrzatkòwi òdjimk. Òdj. Chris Muiden; zdrzódło: https://pl.wikipedia.org/wiki/Wilk_szary#/media/Plik:Canis_lupus_265b.jpg

Całô Pôłniowô Kòreja żëła ògłosama ò przigòdach wôłka, jaczi zwiornął ze zwierzińca. Mają ju gò równak złapóné.

W Pôłniowi Kòreje ze Zwierzińca w Dedzonie zwiornął wôłk Neùgkù. W szëkbie za nim ùdzél miało wzyc nawet trzësta szandarów, a òdjimczi ë nagrania mającé przedstawiac przëtrôfkòwé zetkania ze zwierzëcã pòdbiłë kòrejsczé spòlëznowé media. Wôłk béł z programù reintrodukcje na wòlë ju dzysdnia wëmarłégò gatënkù kòrejsczégò wôłka na Kòrejsczi Półòstrów i miôł bëc wespół ze swòjima bracynama wëpùszczony na wòlã. Weterinarze równak scwierdzëlë, że ten òsobnik so tam nie dô radë i kôzelë òstawic gò w zwierzińcu. Chòc jegò zachòwanié zdrôdzało, że równak cygnie gò do lëdzczich sedlëszczów, ùchwacëc sã długò nie dôwôł. Przez dzewiãc dni służbë co nômni czile razy próbòwałë gò złapac, le òn wiedno sã wëszmitnął. Prezydent Li Dze Miung dôł do wiadë na spòlëznowëch mediach, że mòdli sã ò bezpieczny pòwrót Neùgkù dodóm. W kùńcu dostelë gò w piątk sétmënôstégò łżëkwiata krótkò pò północë. Strzelëlë w niegò ùspôwającą patróną i pòddelë pòd badérowania. Wôłk béł zdrów. Weterinarze przekôzelë, że nie stracył wielë masë, na gwës cos jôdł, a nawet że mùszelë mù z żóta wëcygnąc hôk na rëbë. Zwierzińc w Dedzonie i wëszëznë gardu pòdzãkòwałë wszëtczim, co sã przëczëniłë do ùchwôceniô Neùgkù i sprowadzenié gò nazôd.

H.S.Sz.

Źródło i opracowanie własne