Reklama

Marsz procëm wòjnóm kartelów

Klëka

16/09/2026 17:56

Òdj. Diego Fernández; zdrzódło: https://pl.wikipedia.org/wiki/Wojny_narkotykowe_w_Meksyku#/media/Plik:Fuerza_del_Estado_Michoac%C3%A1n.jpg

Na mirny demònstracje z błogòsławieństwã biskùpã pôdałë téż słowa procëm prezydentce Meksykù, jakô barni winowónégò ò związczi z gangsterama.

W niedzelã trzënôstégò séwnika w gardze Culiacan, stolëcë meksykańsczégò stanu Sinaloa, kòl dzesãc tësący òsób przeszło w marszu procëm wòjnie narkòtikòwëch kartelów. Demònstracjã zòrganizowałë familie òfiarów przemòdżi, Katolëcczi Kòscół i bismóni. Ùczãstnicë wëpùscëlë w niebò biôłé balonë symbòlizëjącé mir i przemarszérowelë szasëjama pòd mieską katédrã. Biskùp Jesús José Herrera wëdôł apel do przesprôwców ò skùńczenié biôtków, bò niżódno teritorium ani ambicje nie są wôrt wicy jak lëdzczé żëcé. Demònstrancë skandowałë téż zéwiszcza procëm prezydentce Claudie Sheinbaùm. Ta mô w swòji pòliticzny partie pòrzeszenia z dôwnym stanowim gùbernatorã Rubénã Rochą Moyą, jaczégò winëją ò związczi z kartelã. Jegò ekstradicje òd prezydentczi domôgôł sã midzë jinszima rząd Zjednónëch Stanów, ale ta gò nie wëdała. Mòcniészé biôtczi wëbùchłë w séwnikù dwa lata nazôd, czej Kartel Sinaloa rozpôdł sã na dwie procëmné sobie frakcje: òkrãżé jednégò wespółzałóżcë Ismaela „El Mayo” Zambadë i familiã drëdżégò wespółzałóżcë Joaquina „El Chapo” Gùzmana. Kartel Sinaloa jistnieje òd òsmëdzesątëch lat ùszłégò stalatégò i je jedną z nôgrozniészich przesprôwczich òrganizacjów w Meksykù. Je na amerikańsczi lësce bùtnowëch terroristicznëch òrganizacjów. Prezydent Zjednónëch Stanów Donald Trump grozył wòjskòwą interwencją w Meksykù, jeżlë rząd so z kartelã nie pòradzy. Claudia Sheinbaum séłała do stanu Sinaloa piãtnôsce tësący żôłnérzów, ale jesz nie przëniosło to kùńca biôtków.
H.S.Sz.

Załączniki