Rekrutëją jak w grze i kôżą zabijac

Métel gamifikacje mô dac młodim mòrdarzóm pòczëcé, że robią pòkrok w wiôldżi przigòdze. Dzejają na pòlét przesprôwcë wespółrobiącégò z reżimã w Iranie.

Służbë Eùropòlu pòdałë, że òd dwa tësące dwadzestégò drëdżégò rokù w jednôsce eùropejsczich krajach doszło do trzëdzescë piãc ataków przeprowadzonëch przez nôleżników przesprôwczi Sécë Fòxtrot. Ataczi te to mòrdarstwa na zlecenié a téż aktë terrorizmù i wandalizmù w célach zrzeszonëch z państwã Izrael abò żëdowską spòlëzną. Wëkònôwcama ataków bëlë nôczãscy nôscelôtkòwie. Séc Fòxtrot je pòwiązónô z dzejającym z zôczątkù w sami Szwédzce Gangã Fòxtrot, założonym przez Rawã Majida, znónégò jakno „Kùrdijsczi Lës”. Szef grëpë òd rujana dwa tësące dwadzestégò trzecégò rokù ùkriwô sã w Teheranie i stamtąd czerëje dzejanim Sécë Fòxtrot, ta atakùje téż na pòlét irańsczégò reżimù. Grëpa kòntaktëje sã z nôscelôtkama przez spòlëznowé media i najimô jich do aktów przemòdżi za dëtczi. Pòdszukòwny wskazéwają, że czerownicë grëpë wëzwëskiwają métel gamifikacje, to je przedstôwianiô zadaniów na ôrt szlachòwny jak w kómpùtrowëch grach. Za przëmiar pòdelë przëtrôfk Johanessa Natlanda z Norwesczi. Do grëpë przërôcził gò jiny nôscelôtk znóny pòd pseùdonimã UnknownHustler jaczégò pòznôł w dodomù dzecka, gdze trafił pò jiwrach psychicznëch a téż z narkòtikama. Drëch dôł mù kòntakt do jinszégò nôscelôtka, pseùdonim Generalen, chtëren béł tedë szestnôsce lat stôri ë miôł za sobą trzë lata w dodomù dzecka w jinszim dzélu Norwesczi. Generał dôł Natlandowi zadanié pòd titlã „Zabicé w Anielsce za dwasta sétmëdzesąt kòrunów”, pòmale dôwkùjącë mù infòrmacje ò célu. Przekôzôł gò do swòjégò pòdwëższégò, Agenta 47, jaczégò pseùdonim je pòżëczony òd pòstacje z serie kómpùtrowëch grów Hitman. Pòdszukòwny są dbë, że Agent to Ali Shehad Ahmed, jeden z drëchów wódcë Sécë Fòxtrot Rawë Majida. Òn kùpił Natlandowi biliet do Manchesteru i pòmógł mù ùdostac paspòrt. Na môlu pòstãpnô persóna zagwësniła mù barniã i jizbã w hotelu. Tam Natlanda trafiła anielskô pòlicjô. Nôscelôtk nie zdążił sã doznac, kògò mô zabic. Wedle pòdszukòwnëch to téż element gamifikacjowi manitwë, a téż métel na ùkrëcé jawernëch planów grëpë w przëtrôfkù ùchwôceniô najmańczików.

H.S.Sz.