Dobiwcą òstała donëchczasnô zastãpniczka wójta. Mòże rechòwac na nowé stanowiszcze ju w stëcznikù.
Rëchlészô welacjô òstała ùrządzonô pò smiercë wójta Leszka Kùlińsczégò latos w czerwińcu. Wójtowôł òn òd 1998 rokù. W pierszim parce welacjów w niedzelã 1. séwnika spòmidzë jednôsce kandidatów dobëlë Ana Glinieckô-Wòs [pòl. Gliniecka-Woś] i Rafôł Kùligòwsczi przë frekwencje 39%. Drëdżé welowanié bëło w niedzelã 15. séwnika. Welowało 30% ùprawnionëch, a wicy głosów dobëła donëchczasnô zastãpniczka ùmarłégò wójta, Ana Glinieckô-Wòs. Głos dało na niã 1842 sztëk lëdzy – 58% welëjącëch.
Wôrt przëbaczëc, że dobëcé w welacje na wójta nie òznôczô za dłudżégò sprôwianiô tegò ùrzãdu. W lëpińcu bëło zéńdzenié Karna ds. Ùstawù Samòrządów, Miesczich i Metropòlitalnëch Òbéńdów Pòspólny Kòmisje Rządu i Teritorialnégò Samòrządu w Minysterstwie Bënowëch Sprôw i Administracje z ùdzélã zastãpniczczi wójta, na jaczim Kòbëlnica òsta zakwalifikòwónô do ùdostaniô miesczich prawów. To znaczi, że òd 1. stëcznika 2025 r. Kòbëlnica stónie sã gminã mieskò-wieską, a wójt gminë òstónie bùrméstrã.
Twoje zdanie jest ważne jednak nie może ranić innych osób lub grup.
Komentarze opinie