Reklama

Szpańsczé eksklawë pòd szturmã

Klëka

01/08/2026 14:54

Ceùta. Òdj. Mario Sánchez Bueno; zdrzódło: https://pl.wikipedia.org/wiki/Ceuta#/media/Plik:Ceuta_desde_el_mirador_de_Isabel_II_banner_(cropped).jpg

W Melillë stojizna wëzdrzi wërazno lepi jak w Ceùce. Rząd scygô wòjskò do pòmòcë lokalnym służbóm.

Òd czwiôrtkù trzëdzestégò lëpińca reno tësące migrantów z Maroka i Algerie cygną do Ceùtë, gardu na marokijsczim sztrądze słëchającégò do Królestwa Szpańsczi. Cywilnô Gwardiô, jakô pilëje grańcznégò przeńscô z Marokã na kraju i na mòrzu, nie dôwô so radë ze rzmama imigrantów. Wikszosc dostôwô sã przez mòrze mijającë wësoczi płot a pòtemù wałochronë. Je to niebezpiecznô droga. Wedle pòdôwków ju sztërdzescë trzë òsobë zdżinãłë próbùjącë sã dostac do miasta. Prezydent Ceùtë Juan Jesús Vivas pòdôł, że grańcã ùdało sã przeńc ju szescdzesąt tësącóm, a to je tëli, co sétmëdzesąt procent lëdztwa w gardze. Ten nôwikszi òd piãc lat migracjowi krizys w Ceùce wëbùchł pò rozkòscérzenim wiadë ò niedôwnym rozsądzënkù szpańsczégò Nôwëższégò Sądu. Ten scwierdzył, że migrantów, jaczi dostóną sã z Maroka do Ceùtë przez mòrze, ni mòże masowò depòrtowac, le kòżdi przëtrôfk mùszi bëc apartno rozwôżony. W piątk szpańsczé Ministerstwò Bënowëch Sprôw pòdało, że trzëdzescë sétmë i pół tësąca òsób same wrócëłë do Maroka. Ti, co òstelë w miesce, w wikszoscë nie gromadzą sã w wëznaczonëch òstrzódkach. Wiele spi na szasëjach. Dochòdzëło do włómaniów do mieszkaniów. Do pòmòcë Cywilny Gwardie rząd wësłôł wòjskò. Migrancë szturmùją téż jinszą szpańską eksklawã na marokijsczim sztrądze, gard Melilla. Ji prezydent Juan José Imbroda rzecze równak, że tu służbë mają kòntrolã nad sytuacją, a migrantów przez grańca przeszło nôwëżi sztërësta.

H.S.Sz.

Źródło i opracowanie własne