Reklama

Szwédzë cwiczëlë masowé pògrzebë

Klëka

03/09/2026 19:47

Pòzdrzatkòwi òdjimk. Òdj. Jorchr; zdrzódło: https://pl.wikipedia.org/wiki/Arm%C3%A9n#/media/Plik:Stridsvagn_122_Revinge_2016-2.jpg

Równé rédżi miechów na cała miałë pòrëszëc zòbrazënã służbów bierzącëch ùdzél w cwiczeniach. Slédny rôz taczé cwiczënczi bëłë w Szwédzce w piãcdzesątëch latach.

Szwédzczé wòjskò dało do wiadë ò przebiegù cwiczeniów Aùrora przeprowadzonëch latos na zymkù. Bëłë to nôwikszé krajewé wòjskòwé cwiczënczi w Szwédzce òd dzewiãcdzesątëch lat. Wzãło w nich ùdzél kòl òsmënôsce tësący żôłnérzi z trzënôsce państwów. W jich òbrëmim trzësta żółnérzów przecwiczëło jednã òsoblëwą zachã wëcmanim z przedstôwcama Kòscoła Szwédzczi, szwédzczi pòdatkòwi agencje i ùrzãdu do sprôw zacëgù do wòjska. Chòdzy ò logistikã przeprowôdzaniô masowëch pògrzebów na wëpôdk wòjnë. Na piãcset manekinach  przecwiczëlë wszëtczé etapë pòstãpòwaniô z òfiarama: wëdostanié ë rozpòznanié côł, dôwanié do wiadë ambasadóm zdrëszonëch państwów czë Czerwionémù Krziżowi, a téż sóm pòchówk z wòjskòwima honorama. Ne cwiczënczi miałë na célu pòdwigniãcé mòrale i przërëchtowanié institucjów na wëpôdk krizysu, a wëszëznë pòdczorchiwają, że Szwédzkô nie przewidiwô narôznégò najachùnkù na swòje teritorium. Slédnô wòjna, w jaczi Szwédzczé Królestwò òficjalno brało ùdzél, bëła w tësąc òsmëset sztërnôstim rokù. Òd dwùch lat Szwédzkô je nôleżnikã Nordowòatlanticczi Zdrëszënë i òd te czasu armiô cwiczi czãscy jak przódë.

H.S.Sz.

Źródło i opracowanie własne