Reklama

Niderlandzkô òdmikô krëjamné archiwa

Klëka

04/01/2025 13:34

Zjôzd NSB w Ùtrechce w 1941 r. Òdj. pùblicznô domena

Akta lëdzy òbwinionëch ò kòlabòracjã z nazystama òb II swiatową wòjnã mają bëc przëstãpné dlô òbëwatelów. Żebë je òbezdrzec, bãdą mùszelë pòjachac do archiwùm.

Niderlandzczé Królewsczé Archiwùm ùprzëstãpniło aliancczé akta tikającé ùdzélu Niderlandów w fùnksnérowanim i dzejanim òkùpacjowëch nazystowsczich wëszëznów òb II swiatową wòjnã. Są tam nôzwëska 425 tës. lëdzy, jaczi bëlë pò wòjnie òbskôrżony ò wespółrobòtã z III Rzeszą, z czegò mni jak 15% dostało sztrôfë za swòje dzejania. Przez pierszé trzë miesące 2025 rokù lësta mô bëc przëstãpnô w Internece, ale mdze sã z ni szło doznac leno miona, nôzwëska, rokù i placu ùrodzeniô persónë, a téż infòrmacje, jaczégò lopka z fùlnyma aktama mòże zażãdac òb czas fizyczny wizytë w Królewsczim Archiwùm. Na Internetowi lësce je wiele lëdzy, jaczi òstelë ùznóny za niedowinne kòlabòracje.
Òb II swiatową wòjnã w niemiecczim wòjskù służëło kòl 20 tës. Hòlandczików. Z Niemcama wespółrobiła faszistowskô partiô Nôrodnosocjalisticznô Niderlandzkô Rësznota (NSB) pòd kòmańdą Antóna Musserta. Wespółprowadzony przez Niemców i Hòlandczików òkùpacjowi rząd brôł aktiw ùdzél w zôgùbie Żëdów, biôtce z rësznotą òpiéru i partizanama, a téż wprowôdzanim totalitarnégò ùstawù.

H.S.Sz.