Prezydencczi pałac i sedzbë ministerstwów òstałë przejãté z rãk rebeliantów, chtërny zajimelë je òd zôczątkù dérëjący ju wnetka dwa lata domôcy wòjnë.
W piątk dwadzestégò pierszégò strëmiannika rządowô armiô Sudanu ògłosëła, że przejãła kòntrolã nad prezydencczim pałacã i sedzbama czile ministerstwów w Chartumie, stolëcë kraju. Bùdinczi te òd łżëkwiata dwa tësące dwadzestégò trzecégò rokù bëłë zajimóné przez rebeliancczé Sëłë Chùtczégò Wspiarcégò. Żôłnérze ùprzëstãpnilë w spòlëznowëch mediach filmik, na jaczim wiwatëją bënë pałacu. Rządowé sëłë dałë do wiadë, że rebeliancë òddalëlë sã na sztërësta métrów. Rebeliancë pòcwierdzywają, że jich półczi dali òstôwają w gardze. Pò przejãcym pałacu miałë téż zaatakòwac gò dronama, przez co zdżinãło czile żôłnérzów i gazétników rządowi telewizje. Dwie fòrmacje zaczãłë midzë sobą domôcą wòjnã dwa lata pò tim, jak w dwa tësące dwadzestim pierszim razã zòrganizowałë pùcz i òbalëłë rząd premiérë Abd Allaha Hamduka. Wòjna kòształa dotądka żëcé wicy jak dwadzescë tësące òsób i przëmùszëła sztërnôsce miliónów do wëcygniãcô ze swòjich dodomów. Òbie starnë dopùszczałë sã etnicznëch mòrdów, torturów i ataków na cywilów. Wedle znajarzów przëjãcé rządowëch bùdinków przez armiã mòże zapòwiadac chùtszi kùńc wòjnë.
H.S.Sz.
Twoje zdanie jest ważne jednak nie może ranić innych osób lub grup.
Komentarze opinie