Humbak wëpùszczony do Nordowégò Mòrza

Kawel wiôlgòrëba, co sã rozbijôł pò niemiecczim sztrądze, òstôwôł niegwësny. Dali nie je wiedzec, co z nim bãdze, ale nie płiwô ju w groznym dlô jegò zdrowiégò Bôłce.

Chòrégò humbaka, co media dałë mù na miono Timmy, òd strëmiannika wiele razy ju retowelë pò tim, jak wpłiwôł na snôdczëznë bôłtëcczégò sztrądu pò niemiecczi starnie. Pò kòżdim ùwòlnienim zôs sã zasztopiwôł, a kòżdô retënkòwô akcjô dosc tëli kòształa włôdzë. W kùńcu wëszëznë Meklembùrsczi-Przédnëch Pòmrów za doradama badérów wiôlgòrëbów i òrganizacjów pòmôgającëch mòrsczim zwierzãtóm zadecydowałë ò tim, żebë Timmy'émù ju nie pòmagac i dac mù zdechnąc, czej zôs wpłënie na jaką snôdczëznã. Zwierzã cerpiało na chòroscë skórë przez nienôterno nisczé dlô humbaków zasolenié Bôłtu, a jegò zachòwanié wskazéwało téż na jaczés fele nérwòwégò ùstawù. Wedle wiadłów z dzewiãtégò łżëkwiata znajarze dôwelë cëcónowi jesz òd czile gòdzyn do czile dni żëcô. Nimò to, czej wal równak dali dokazéwôł chãcë żëcô, land dôł pòzwòlenié na kòntrowersjową ùdbã slédny retënkòwi akcje: wsadzenié humbaka na barkã i zahalanié gò nazôd do Nordowégò Mòrza, z jaczégò òn przëpłënął gwës w góńbie za rëbama. Ten bédënk delë miliónerka Karin Walter-Mòmmert i wespółzałóżca Media Marktu Walter Gùnz. Chòc kritikòwała ùdbã midzë jinszima Midzënôrodnô Kòmisjô Wiôlgòrëbiznë, zgòdã òni dostelë i zòrganizowelë transpòrt. W piątk pierszégò maja barka z cëcónã bëła jesz na Bôłce, płënãła zdłuż sztrądu nordowi Dëńsczi. Tam mòrze zaczãło ùtrëdniwac akcjã; wedle relacje kapténë jednostczi Martina Bòcklage wałë sygałë dwùch métrów. Dlôte barka pózdni nie doturzëła tak dalek na zôpôd, jak z zôczątku bëło ùmëslóné. W sobòtã drëdżégò maja reno wëpùscëlë Timmy'égò na òdemkłé mòrze w òkòlim dëńsczégò gardu Skagen ù zetkaniô zwãżënów Skagerrak i Kattegat. Humbak wëpùscył fòntanã wòdë z durë na chrzebce i pòpłënął na zôpôd. Tedë téż zmerkelë, że òd drãdżégò transpòrtu dostôł pòstãpnëch, ale drobnëch zrenieniów. Dëńsczi minister strzodowiszcza Magnus Heunicke dôł do wiadë, że jeżlë zwierzã wpłënie na snôdczëznã tą razą ù dëńsczégò sztrądu, òd môlowëch wëszëznów pòmòcë ju nie dostónie.

H.S.Sz.