Reklama

Marszôłk procëm chòwie kwëkù w Dãbnicë

Klëka

28/04/2026 22:33

Òdj. https://www.facebook.com/photo/?fbid=122129895075107496&set=a.122097547173107496

Procëmnicë ùdbë gôdają, że to je smierdzącô zagrôżba dlô strzodowiszcza, gminë Człëchòwò i samégò miasta Człëchòwa. Marszôłk je zgòdą z jich ùwôgama.

Jeden inwestór w gminie Człëchòwò chce ùsadzëc fermã kùrów na jaje. Miałabë zajic sto piãcdzesąt trzë hektarë, a w sztërnôsce kùrnikach miałobë sã chòwac pół milióna sztëk kwëkù. Procëm ùdbie òd czile miesący mòcno protestëją mieszkańcë Dãbnicë. Wskazéwają, że wedle planów grańce fermë miałëbë sã cygnąc leno trzësta piãcdzesąt métrów òd Chroniony Òbéńdë Krôjmalënkù Człëchòwsczich Jezór i prakticzno zarô kòl chëczi we wsë. Strach ò smród òd kùrzégò gnoju mają nié le Dãbniczanie, bò wiôlgòsc inwesticje mògłabë sprawic, że wiater mòże pòhalac smród na całé Człëchòwò. Dlô gardu, co chce sã promòwac jakno latnô turisticznô atrakcjô, béłbë to jiwer przënôszający wiôldżé stratë. Marszôłk pòmòrsczégò wòjewództwa Mieczësłôw Struk wëdôł negatiwną òpiniã dlô planowóny bùdacje. W dokùmence je sétmënôsce ùwôgów, te schôdają sã ze zbòjaniama mieszkańców. Chòdzy ò cësk strzodowiszczowi ë spòlëznowi, a téż niegwësnoscë co do wëwòżeniô gnoju i systémë strzëmiwaniô lëchëch pôchów. Òpiniô marszôłka jesz nie znaczi, że inwesticjô nie pòwstónie. Zanôleżi to òd wójta Paùla Dżibczińsczégò, ten z wëdanim strzodowiszczowi òpinie żdże za rapòrtã Pòlsczich Wód i sanepidu.

H.S.Sz.

Źródło i opracowanie własne Aktualizacja: 28/04/2026 22:46