Reklama

Płoną lasë w Japóńsce

Klëka

28/04/2026 20:54

Pòzdrzatkòwi òdjimk. US Forest Service photo - http://inciweb.org/incident/pictures/full/978/3/; zdrzódło: https://pl.wikipedia.org/wiki/Po%C5%BCary_las%C3%B3w#/media/Plik:Moonlight_fire_usfs.jpg

Na Honszu dérëje òdżin lasów w trzech prefekturach. Ògniarze żdżą za deszczã, bò lanié wòdë z helikòptrów nie pòmôgô.

Òdżin w lasach to rzôdczi jiwer w Japòńsce. Òd szesc dni równak jeden z wikszich taczich ògniów òd lat warô w prefekturze Iwate na nordze òstrowù Honszu. Tësąc sztërësta ògniarzów i sto żôłnérzów Japòńsczi Sëłë Samòòbarnë je wësłóné do biôtczi z płomieniama w lasach wkòl gardu Òcuczi. Spôlëło sã tam ju przez tësąc trzësta hektarów drzéw. Zagrożoné są mieszkalné dzéle miasta. Wëszëznë kôzałë sã ewakùòwac trzë tësące dwasta trzëdzesce trzema mieszkańcóm, co je kòl jedny trzecy całi pòpùlacje gardu Òcuczi. Bùrméster Kòzo Hirano przekôzôł, że drãgò je òdżin gasëc nawet z lëftu, bò sëché wiodro i wiater pòmôgają płomienióm sã rozkòscerzac. Mieszkańcë rëchtëjący sã do ùceczczi leją wòdã na swòje roscënë i chëczë, mającë nôdzejã na zminimalizowanié rizyka stratów. Pòstãpné ògnie wëbùchłë w niedzelã dwadzestégò szóstégò łżëkwiata w prefekturach Fùkùszima i Niigata, blëżi westrzódka òstrowù Honszu. Tam szlachòwno jak w Iwace przez sëché wiodro płomienie chùtkò sã rozlôżają pò lasach, le wëszëznë ni mùszałë wëdawac nakazu ewakùacje jaż tak wiele lëdzóm. W gardze Kitakata, gdze mieszkô wnet sztërdzescë piãc tësący òsób, za direktno zagrożonëch wëszëznë ùznałë leno sztëresta piãcdzesąt òsmë.

H.S.Sz.

Źródło i opracowanie własne