Reklama

Mniszë szmùglowelë marihuanã

Klëka

28/04/2026 21:09

Pòzdrzatkòwi òdjimk. Da~commonswiki; zdrzódło: https://pl.wikipedia.org/wiki/Bhikku#/media/Plik:LittleMonks897.JPG

Wrôcelë z wakacjów na Tajlandie z jedną z nôdrãgszich òdmianów indijsczi kònoplë. Bëło ji w sëmie sto dzesãc kilogramów.

Na Latawiszczu Kòlombo na Sri Lance w niedzelã dwadzestégò szóstégò łżëkwiata pòlicjô zatrzimała dwadzesce dwùch bùddijsczich mnichów. Wrôcelë ze sztërëdniowégò wëjazdu do Tajlandie. W jich bagażach za falszëwima scankama òchrona nalazła w sëmie sto dzesãc kilogramów marihuanë zrobiony z kùszu, fest mòcny òdmianë indijsczich kònoplów. Wikszosc ùczãstników rézë to bëlë nowicjusze służący w czile swiãtnicach na Sri Lance. Wakacje jim òpłacył jeden bismón. Pòlicjô sprôwdzy, czë to nié òn zòrganizowôł szmùglowanié narkòtików. Na mòbilkach mnichów szandarzë nalezlë òdjimczi z jich wakacjów, na jaczich ùczãstnicë rézë spãdzywelë swój wëjôzd òblokłi czësto swieckò. Jeden starszi mnich, jaczi nie béł na wëjezdze, ale gò òrganizowôł, òstôł zatrzimóny na przedmiescym Kòlombò. Kòntaktowôł sã z młodima mnichama i gôdôł jim, że pò jich bagaże przëjedze van. Pò zatrzimanim przewiezlë jich do sądu w Negòmbò, gdze zeznelë, że nie wiedzelë, co mają wsadzoné do bagażów, bò òkróm marihuanë òne bëłë fùl szkòłowëch przibiorów i słodczëznë. Pòlicjô przekôzała, że dowiérzô mnichóm i zakłôdô, co w szmùglã jich wkrącył jejich pòdwëższi, co ùrządzôł wëjôzd. Wëszëznë latawiszcza pòcwierdzëłë, że to nôwikszô w jegò historie wielëna narkòtików wëkrëtô narôz òb czas kòntrolë i pierszi rôz, jak mùszelë wzewac pòlicjã do mnichów.

H.S.Sz.

Czytaj nas w Google

Dodaj do Google

Źródło i opracowanie własne