Inwesticjô za 6 mln złotëch w wicy jak pòłowie mô bëc zapłaconô z rządowégò ùdëtkòwieniô.
W sobòtã 23. smùtana zastãpnik prezydenta Wejrowa Arkadiusz Kraszkewicz i przédnik firmë TORAKOL pòdpiselë ùgôdënk na bùdacjã nowégò rekreacjowò-spòrtowégò kómpleksu na Òbsadłowim Drëszbë we Wejrowie, jaczi mô stanąc na placu za dôwnym hotelã „Bliza”. Zwënégòwanié inwesticje je òbrechòwóné na jeden rok i mô kòsztac kòl 6 mln złotëch. Gard ùdostôł na ten cél 3,5 mln złotëch dofinancowaniégò z rządowégò programù wspiarcégò dlô samòrządów bãdącëch krótkò môlu bùdowë planowóny atomòwi elektrownie w gminie Chòczewò.
Spòrtowi teren mô bëc dopasowóny do brëkòwnotów lëdztwa w kòżdim wiekù. Firma TORAKOL mô przez 12 miesãcy wëbùdowac place do grë w fùsbalã, badmintona a téż wielefùnkcjowé, bieżnie, stegnë zdrowiégò, jigrowi plac, bùtnową mòcowniã czë grzëpkã do zjéżdżaniô na sónkach. Mô bëc téż rozbùdowóny plac parkour, a dodôwkòwò przë kómpleksu mają stanąc wichódczi, parkindżi i magazynowé bùdinczi.
H.S.Sz.
Twoje zdanie jest ważne jednak nie może ranić innych osób lub grup.
Komentarze opinie