Lëdze nie bëlë rôd ze słów ministra gbùrzëznë w sztóce, czej krôj biôtkùje ò zmniészenié prizu za riz. Pòdôł sã do dimisje.
Na pòtkanim rządzący w Japònie Liberalno-Demòkraticzny Partie w niedzelã òsmënôstégò maja minister gbùrzëznë, lasëznë i rëbaczeniô Takù Eto wspòmniôł, że dzysdnia nie kùpùje ju rizu, bò dostôwô gò tëli òd swòjich przëstojników za darmôka, że nawetka mógłbë gò przedawac. Jegò słowa sprawiłe wiôldżé rozprzeniesenié w Japònie, bò krôj prawie biôtkùje z wësoczima prizama za riz, jaczé sygłë za piãc kilogramów ju sztërë tësące dwasta szescdzesąt òsmë jenów, z czegò wëchôdô kòl sto jednôsce złotëch. Pò kritice nié blós ze starnë pòliticznëch procëmników, le téż premiérë Shigeru Ishibë, Eto z zôczątkù chcôł sã tłómaczëc ze swòjich słów. W pòniedzôłk rzekł, że gôdôł ze swòją białką i doznôł sã, co òna równak kùpùje riz w krómie, bò ten, co dostôwają òd jinszich, dlô całi rodzëznë nie sygô. W kùńcu minister złożił rezygnacjã z ùrzãdu w strzodã dwadzestégò pierszégò maja i przeprosył za swòje nierozwôżné słowa. Na nowégò ministra gbùrzëznë premiéra wëbrôł pòpùlarnégò Shinjiro Koizumiégò, sëna ùszłégò prëmiérë Junichiro Koizumiégò.
H.S.Sz.
Twoje zdanie jest ważne jednak nie może ranić innych osób lub grup.
Komentarze opinie