Reklama

Rozdanié Ig Noblów pierszi rôz w Eùropie

Klëka

12/03/2026 20:40

Ze swiata, Rozdanié Noblów pierszi Eùropie - zdjęcie, fotografia

Pò zaòstrzenim imigracjowëch i wizowëch przepisów w Zjednónëch Stanach, kapituła nôdgrodë wëcygô z ceremóniama do Szwajcarsczi.

Redakcjô amerikańsczégò dwamiesãcznika „Annals of Improbable Research”, jakô przëznôwô humoristiczné nôùkòwé nôdgrodë Ig Noble, ògłosëła wôżną zjinakã w ceremónie rozdaniô. Òd tësąc dzewiãcset dzewiãcdzesątégò pierszégò rokù wëapartnienié za „nôùkòwé òdkrëca, co piérwi smiészą, a tej dôwają do mëszleniô” wiedno przëznôwelë w Zjednónëch Stanach, midzë jinszima na Ùniwersytece Harvarda. Latos przeniesą to do Szwajcarsczi, do Curichù. Jak pòdelë, tã decyzjã pòdjimnãlë w związkù z zaòstrzenim migracjowi pòliticzi Zjednónëch Stanów. Chòc òno je sczerowóné w przédny rédze procëm lëdzóm mającym ùdbóné na dłëżi ostac w Americe, dotikają téż miéwców sztudérsczich i turisticznëch wizów. Redakcjô cządnika gôdô, że nie chce narażac dobiwców nôdgrodë ani gazétnikôw z bùtna Zjednónëch Stanów na jaczélebądz nieprzëjemnoscë w związkù z bëtnictwã na ùroczëznie. Latos rozdanié bãdze w séwnikù. Nie je przewidzóné, żebë w przińdłëch latac wrócëc do Americzi. Rozdania mają bëc òd terô co dwa lata. Badérowania nôdgrodzoné łoni tikałë sã midzë jinszima malowaniô krów w mrãdżi jak ù zebrów, żebë ùchronic je przed mùchama, a téż cëskù alkòholu na gôdanié w cëzym jãzëkù.

H.S.Sz.

Źródło i opracowanie własne