Reklama

Trzë sostrë i òjc prowadzëłë ruchnowi gang

Klëka

07/03/2026 17:12

Kradélcczi z gminë Człëchòwò jezdzëłë nawet pò sto kilométrów za łëpã. Òjc miôł pòmagac z jegò przedôwanim.

Pòlicjô z Człëchòwa dała do wiadë ò rozbicym familiowégò gangù w regionie. W stëcznikù kòmijka jednégò z ruchnowëch krómów w Człëchòwie zgłosëła kradélstwò, jaczégò miałë sã dopùscëc trzë młodé białczi. Szandarzë je ùchwôcëlë. Bëłë to sostrë òd dwadzesce jeden do dwadzesce dzewiãc lat stôré. Miałë przë sobie dwie tasze ruchnów z metkama za piãcset sétmëdzesąt szesc złotëch. Kòmijka pòcwierdzëła, że znaje sprôwcczi, bò czej bëłë w krómie slédną razą, téż jaczés ruchna zniknãłë z wiészników. Szandarzë przëjachelë do nich dodóm na terenie gminë Człëchòwò. Tam nalezlë kòl sétmëdzesąt dwa miechë ruchnów. Òd stëcznika dzewiãcset szescdzesąt szesc skradłëch sztëk òstało zidentifikòwóné przez miéwców krómów nawet sto kilométrów òd Człëchòwa. Jich parłãczny priz to trzëdzesce jeden tësący złotëch. Dotąd białczi ùczëłë òbwinë ùkradzeniô ruchnów za dwa tësące piãcset òsmëdzesąt dzewiãc złotëch. Przëznałë sã wszëtczé trzë. Jich sztërdzescë szesc lat stôri òjc ùczuł òbwinë paserstwa. Miôł pòmagac przedawac ùkradłé ruchna co nômni òd czerwińca łońsczégò rokù. Chłop sã nie przëznôł. Pòlicjô pòdczorchiwô, ża sprawã mòże sã jesz rozwic, bò òstôwô skòpicą ruchnów, ò jaczich jesz ni ma wiedzec, skąd są. Do zbadérowaniô je téż skala jich nielegalny przedażë.

H.S.Sz.

Źródło i opracowanie własne