Reklama

Ruskô wëcopiwô sã z werbùnkù w czile afrikańsczich krajach

Klëka

09/03/2026 10:41

dj. US Air Force - http://hn.afnews.af.mil/Photopages/KazakstanSoldiers-B-O.html; zdrzódło: https://pl.wikipedia.org/wiki/Si%C5%82y_Zbrojne_Federacji_Rosyjskiej#/media/Plik:Russian_paratroopers_in_Kazakhstan.jpg

Afrikańczicë jachelë służëc w rusczim wòjskù i dżinãlë na ùkrajińsczim fronce. Czile rządóm ùdało sã przekònac Rusków, żebë delë jich òbëwatelóm pòkù.

Pòd kùńc gromicznika minister bùtnowëch sprôw Ùkrajinë Andrij Sybiha òpùblikòwôł zebróné przez wëdowiédzã dóné ò werbùnkù Afrikańczików do rusczégò wòjska na wòjnã z Ùkrajiną. Dzysdnia służi tam przeszło tësąc sétmëset òbëwatelów z trzëdzescë szesc afrikańsczich krajów. Zacygają jich werbùnkòwé bióra, jaczé wespółrobią z rusczima ambasadama. Co nômni trzësta szestnôsce Afrikańczików zdżinãło na fronce. Wskazë przeżëcô dlô taczich rekrutów to miesąc. Rządë niechtërnëch państwów zainterweniowałë ù Rusków i zażądałë strzimaniô zacëgù i òdesłaniô rekrutów z Africzi dodóm. W midzëczasu ù sebie zaczãłë sã bôczlëwi przëzerac rusczim werbùnkòwim bióróm. W òdpòwiescë Ruskô wcygnãła Ghanã, Keniã, Nigeriã, Repùblikã Pôłniowi Africzi, Senegal i Tanzaniã na lësta sztërdzescë trzech krajów, w jaczich rusczé służbë mają sã strzëmac z szukanim za nowima najmańczikama. Mô to na célu zagwësnic òstanié przë dobrëch diplomaticznëch relacjach. Wikszosc państwów na lësce leżi w Africe. Zacyg dërch je prowadzony w Beninie, Bòtswanie, Demòkraticzny Repùblice Kònga, Malawi, Togò, Ùbrzegù Słoniowégò Gnôta, Zambie i Zimbabwe – krajach, jaczé nie zgłosëłë zastrzégów. Tam téż rekrutérzë wzãlë sã do òstrzészi robòtë, żebë nadrobic za kraje, z jaczich żôłnérzi Ruskô ju najimac nie bãdze.

H.S.Sz.

Źródło i opracowanie własne