Sztrid ò grańcã wëmierzoną na zôczątkù ùszłégò stalatégò co jaczis czas sã òdrôdzô i zbiérô pòsobné òfiarë. Przez dwa dni òd czwiôrtkù zdżinãło co nômni piãtnôsce lëdzy, w wikszoscë cywilów.
We czwiôrtk dwadzestégò czwiôrtégò lëpińca w szesc placach na tajskò-kambòdźańsczi grańcë doszło do biôtków midzë armiama òbùch państwów. Dwie starnë nawzôj sã òbskarżiwają ò zaatakòwanié jakno pierszé. Przez piątk lëczba placów, w jaczich doszło do wëmianë ògnia, ùrosła do czilenôsce. Tajsczi rząd pòdôwô, że zdżinãło ju sztërnôsce Tajów, w tim trzënôsce cywilów, a renionëch bëło sztërdzescë szesc, z czegò cywilów trzëdzescë jeden. Kambòdżańskô starna dała do wiadë ò smiercë jednégò cywila i piãc òsobach renionëch. Z przëgrańcznëch terenów ùcekło ju przez sto tësący lëdzy. Òba krajë wërôżają zbòjania ò rozszérzwienié sã kònfliktu, chòc pòdsztrichiwają, że jak na terô ni mòże gadac ò wòjnie, a dzejania wòjsków nie sygają bùten przëgrańczny òbéńdë. Premiéra Kambòdżë Hun Manet zaapelowôł ò zwòłanié Radzëznë Bezpiekù Òrganizacje Zjednónëch Nôrodów, a rzecznik tajsczégò ministerstwa diplomacje pòdôł, że jegò krôj je gòtów do dwastarnëch negòcjacjów, w czim pòmòc zabédowałë ju Chinë, Zjednóné Stanë i Malezjô. Sztrid midzë Tajlandią a Kambòdżą ò tur wëmierzony grańcë je baro stôri i sygô jesz kòlonialnégò cządu i ùgôdënkù midzë Syjamã, to je dzysdniową Tajlandią, a francësczima kòloniama w Indochinach.
H.S.Sz.
Twoje zdanie jest ważne jednak nie może ranić innych osób lub grup.
Komentarze opinie