Prezydent Zeman zeznôł, że zléwôł gòscóm do òzdobnëch bùdlów slëwiónkã, co mù zbiwała. Bùdle bëłë z aùtoserwisu.
Czesczé media przedstawiłë dokùmentë z wëdowiédzë tikający sã pòdezdrzóny slëwiónczi, jaką ùszłi prezydent Czesczi Repùbliczi Miloš Zeman rozdôwôł w darënkach głowóm państwów, jaczé biwałë ù niegò na Prasczim Zómkù, w prezydencczi sedzbie. Nie je dokładno wiedzec, skądka Zómk brôł alkòhol. Nalazłë sã fakturë na sztërësta dwanôsce òzdobnëch bùdlów „slëwiónczi z etikétą i pòdpisënkã Miloša Zemana w paczétach”. Jedna takô bùdla kòształa wnetka trzë tësące czesczich kòrunów, z czegò wëchôdô kòl piãcset złotëch. Bëłë òne zamówioné z firmë Mammut Store, jakô prowadzëła aùtoserwis, ale ni miała niżódnëch robòtników, a tim barżi kòncesje na alkòhol. Zeman i jegò kancelariô zeznelë, że zamôwióné bëłë blós pùsté bùdle. Do nich zléwelë òd jinëch bùdlów i flôszków slëwiónkã, jaką Zeman dostôwôł wczas swòji prezydenturë, pò tim jak rzekł, że slëwiónka to je jegò ùlëdóny napitk, a mù zbiwała. Przë tim nie je wiedzec, czë bëłë ùchòwóné jaczés normë higienë, ale òb no przeléwanié całô slëwiónka bëła wedle nich sprôwdzonô na bëtnosc metanolu. Pò czile bùdlów tak zlónégò sznapsa dostelë prezydentowie Pòlsczi, Madżarsczi, Izraela, a nawetka emir Kataru, gdze alkòhol je zabróniony. Służbë nie zbadérowałë sprawë dali, nimò wątplëwòsców co do tak drodżich bùdlów i dlôcze przedawała je aùtołowô warkòwniô.
H.S.Sz.
Twoje zdanie jest ważne jednak nie może ranić innych osób lub grup.
Ten komentarz jest ukryty - kliknij żeby przeczytać.
Ten komentarz jest ukryty - kliknij żeby przeczytać.