Przez demònstracje procëm rządowi kòrupcje na szasëjach Katmandu dżiną cywile i szandarzë.
W ùszłim tidzeniu rząd Nepalu zakôzôł dzejaniô w kraju dwadzesce szesc internetowëch platfòrmów, midzë jinszima Facebooka, YouTube'a, Messengera, Instagrama, WhatsAppa, X, Discorda czë Reddita. Òd czwiôrtkù czwiôrtégò séwnika Nepalczicë ni mają do nich direktnégò przistãpù. Wedle rządu je to skùtk niewëwiązaniô sã tëch platfòrmów z òbrzészkù wëznaczeniô regionalnégò przedstôwcë, jaczi bë dozérôł tegò, żebë zamkłoscë wëskrzëniwóné na terenie Nepalu nie łómałë môlowégò prawa, co wedle rządu miałobë znaczëc cenzurã falszëwëch wiadłów, mòwë niezgarë ë internetowëch szachlarstwów. Niechtërne platfòrmë jak TikTok dopasowałë sã do nepalsczégò prawa i wcyg mòże jich brëkòwac. W pòniedzôłk ósmégò séwnika na szasëje Katmandu, nepalsczi stolëcë, wëszlë protestëjący procëm zôkazowi, a téż òglowò procëm kòrupcje rządu i jegò aùtoritarnym zgrôwóm. Ògrańczenié przistãpù do spòlëznowëch mediów ùznôwają òni leno za pòstãpny przëmiar próbów ògrańczeniô wòlnoscë słowa. Turisticznô branża, na jaczi we wiôldżim dzélu òpiérô sã gòspòdarka kraju, dała téż bôczenié na to, że bez spòlëznowëch mediów wiele firmów do czësta stracy mòżlëwòsc reklamë swòjich ùsłëgów za grańcą. Protestë pòskùtkòwałë ju smiercą dzewiãtnôsce lëdzy i zrenienim kòl sto, tak pò starnie protestëjącëch jak szandarów. Rzecznik pòlicje pòdôł, że òd czedë hurma próbòwała dostac sã do bùdinkù parlamentu, szandarzë zaczãlë ùżëwac wòdnëch kanónów, gùmòwëch patrónów i pôłków procëm demònstracjóm.
H.S.Sz.
Twoje zdanie jest ważne jednak nie może ranić innych osób lub grup.
![Co? Dze? Czedë? [3-8.08]](https://cdn.cmc-gallery.pl/static/files/gallery/590/thumb__1884964_1756835684.webp)
Komentarze opinie