Reklama

Sprôwca zakaleniô sztrądu nieznóny

Klëka

09/10/2026 13:17

Òdj. z facebookòwi starnë: Urząd Morski w Słupsku

Mòrsczi Ùrząd gôdô, że sztrąd je ju czësti, ale chto gò ùczapôł, nôgwësni ju nie ùdô sã wëkrëc.

Pòd kùńc séwnika letnicë, jaczi szpacérowelë sztrądã na terenie Ùstczi, nalezlë czôrną òlejistą substancjã, jakô zalégała na piôskù. Wòniała za petrólką i szło sã nią łôtwie ùczapac. Nalezlë tã substancjã téż na jinëch pieglëszczach òd grańcë Słowińsczégò Nôrodnégò Parkù do grańcë Centralnégò Pòligònu Lëftowëch Sył, a téż w Jarosławcu czë Rusënowie. Mòrsczi Ùrząd we Słëpskù zażorgôł ò rëmniãcé dzywny mazë ze sztrądu. Przez charakter substancje, bëła to colemało rãcznô robòta łopatama, grablama i pétlama. Służbë zebrałë kòl dwa tësącë sto kilogramów òdpadów, w co wchòdzy masa sami mazë razã z piôskã, co gò sã nie ùdało przepétlowac. Substancjô je petrochemicznégò pòchòdzënkù i je zbùdowónô w przédny rédze z alifaticznëch wãglowòdzyków. Direktórka Mòrsczégò Ùrzãdu we Słëpskù Ana Sãdzyńskô dała do wiadë, że drãgò mòże bëc nalezc sprôwcã zakaleniô. Chcelë sprôwdzëc jeden òkrãt, jaczi w czasu wëkrëcô substancje akùrôt jachôł kòl Ùstczi, ale czej zlécelë jegò kòntrolã, òn miôł ju wëczëszczoné ladownie i niżódnëch szlachów nie dałobë sã nalezc. Pieglëszcza ju są pòsprzątóné. Jeżlë ùrząd wicy szlachów zakaleniô nie nańdze, bãdze szukôł za firmą, jakô przeprowadzy ùtilizacjã zebróny substancje. Prawie na ùtilizacjã pùdze nôwicy dëtków z całi akcje czëszczeniô sztrądu.

H.S.Sz.

Źródło i opracowanie własne