Reklama

Cwiczëlë pierszą pòmòc na żëwëch pòjmańczikach

Klëka

05/10/2026 19:16

Òdj. 2s3m akatsiya; zdrzódło: https://pl.wikipedia.org/wiki/Grupa_Wagnera#/media/Plik:Wagner_flag.jpg

Ùriwelë nodżi trotilã, òdcynelë je maczetą, strzelëlë w tãtnicã abò żgelë nożã – tak òbchôdelë sã w Africe na cwiczeniach z pierszi pòmòcë dlô Grëpë Wagnera.

Dmitro Karpenkò, ùkrajińsczi gazétnik nôbarżi znóny z wëdowiédzów z rusczima wòjnowima pòjmańczikama, w slédnym czasu gôdôł z nôleżnikã Grëpë Wagnera. Ten służił w Africe, gdze żôłnérze z ti jednostczi òstelë zaprzëgłi na rôczbã malijsczégò rządu do biôtczi z pòwstaniã dżihadistów. Pòjmańczik pòcwierdzył trójné doniesenia ò tim, że Ruscë w Africe wiele razy łómelë prawa człowieka tak w pòstãpòwanim z cywilama jak z pòjmańczikama. Wagnerówc gôdôł, że czej przëjachelë do Mali, zaczãło sã òd ùczbë wsôdaniô i wësôdaniô z òpancerzonëch wòzów. W pòstãpnëch etapach przëùczbieniô doszło do mòrdarstwa. Na ùczbie z pierszi pòmòcë miast manekinów wagnerówcë cwiczëlë na żëwëch lëdzach – pòjmańczikach ùchwôconëch òb czas biôtków z pòwstańcama. Jednémù pòjmónémù ùrwelë nogã przez wëbùchòwi ladënk, a tej kôzelë chùtkò ùdzelëwac pierszi pòmòcë – pòstãpny żôłnérze zarzesziwelë i òdrzesziwelë òpôskã na nodze, czej chłop krzikôł a płakôł z bólu. Pòtemù instruktorzë pòstrzelëlë pòjmańczika w tãtnicã pòd pachą i zôłnérze mielë cwiczëc téż na jegò rãce. Tej pòjmańczika òstawilë, żebë sã wëkrëwawił, a żôłnérzów sczerowelë do jinszich zadaniów. W przëtrôfkù jinszégò pòjmańczika dochôdało do żganiô nożã w serce abò òdcynaniô rãk i nóg maczetą. Tu zôs rennégò na kùńc òstawilë na smierc. Słowa wagnerówca to le pòstãpné z trójnëch donieseniów ò łómanim prôw człowieka przez rusczich najmańczików w Africe. Sóm pò òstanim wódcą jedny òbsadë zarôbiôł na miesąc kòl trzë tësące dolarów i sto dolarów dietë na dzéń.

H.S.Sz.

Załączniki