Wedle Eùropejsczi Kòmisje òd szescdzesąt do sétmëdzesąt procent gruńtów w Eùropejsczi Ùnie je w lëchi stojiznie. Przëjimniãté òstałë rozrzeszenia, co mają dac wikszé bôczenié na ten tôczel.
Radzëzna Eùropejsczi Ùnie i Eùropejsczi Parlament zacwierdzëłë wstãpno przëjimniãté pòrozmienié ò pòspólnëch sztandardach dozéru nad jakòscą gruńtów w Ùnie. Wedle dzysdniowëch òbtaksowaniów przez szescdzesąt procent je w lëchi stojiznie, a ta robi sã jesz gòrszô. Nowé pòrozmienié mô wprowadzëc nowi system mònitorowaniô, tak żebë kòżdé państwò sprôwdzało gruńtë wedle krajewëch rejestrów, na spòdlim sztandardów ùgôdónëch na rówiznë Ùnie. Parlament i Radzëzna nie wprowadzëłë niżódnëch òbrzészeniów co do ùprawieniô jakòscë gruńtów, a na priwatné òsobë, jak miéwców gruńtów, ni mają bëc nałożoné niżódné dodôwkòwé kòszta. Fùnksnérowanié krajewëch rejestrów mô wesprzéc Eùropejskô Kòmisjô. Pòrozmienié mô téż dzejac procëm skùtkóm zajimaniô gruńtów ze stójnym jich zlësziwanim. Wedle òbtaksowaniów ùnijnëch institucjów degradacjô gruńtów na rok kòsztô kòl miliard dwasta piãcdzesąt miliónów eùro w gbùrzëznie, a òglowò przënôszô stratë przeszło piãcdzesąt miliardów eùro.
H.S.Sz.
Twoje zdanie jest ważne jednak nie może ranić innych osób lub grup.
Komentarze opinie