Napłiw mroznégò lëftu znad Antarktidë sprawił òsoblëwie cãżką zëmã téż midzë jinszima w Chile i Brazylie.
Pòd kùńc czerwińca temperaturë w niechtërnëch òbéńdach Argentinë i Chile bëłë nôniższé na swiece òkróm pòlarny conë. Na pôłniowi półkùglë dérëje terô zëma, le w tëch krajach mieszkańcë i tak rzôdkò doswiôdczają temperaturów na minusu. Zanôleżno òd zdrzódłów są wiadë ò òd trzech do dzewiãc lëdzy w Argentinie, jaczé ùmarłë przez nisczé temperaturë, a wikszosc z nich to bezdomôcy. We strzodã drëdżégò lëpińca w stolëcë kraju, Buenos Aires, bëło minus jeden i dzewiãc dzesątëch grada – nôwikszi zyb òd trzëdzescë sztërzech lat. Krajewi rekòrd pôdł równak w Palomarze na przedgardzym stolëcë – minus sétmë i sztërë dzesąté grada, nômni òd piãcdzesąt òsmë lat. Wëszëznë nakôzałë strzimanié przedażë gazu na benzynowëch stacjach a téż pòzamikanié niechtërnëch geszeftów, żebë zagwësnic dosc gazu do ògrzéwaniô w chëczach.
H.S.Sz.
Twoje zdanie jest ważne jednak nie może ranić innych osób lub grup.
Komentarze opinie