KÒPIKÙLKA - skecz

KÒPIKÙLKA

Wëstãpùją:
Petentka: Grażina Kùlke
Czerownik Ùrzãdu Robòtë: Sztefón Natrzasłi
Czerownik smãtôrza: Józy Trëma

Na binie stoji biórkò na jaczim leżą papiórë ë stôrô maszina do pisaniô. Na stółkù sedzy ùrzãdnik Sztefón Natrzasłi. Mô szpérë na biórkò wëcygnioné, pije kôwkã, a grzebie so w knérze. Nigle bez klepaniô na dwiérze wpôdô grëbô, nerwés białka: Grażina Kùlke.

Grażina Kùlke
Dobri…

Sztefón Natrzasłi
(z pôlcã w knérze)
Zarô, zarô, nie widzy, że tu sã robi?!

Grażina Kùlke
Jô prawie w ti sprawie.

Sztefón Natrzasłi
(zadzëwòwóny)
W jaczi sprawie?

Grażina Kùlke
Në kò robòtë.

Sztefón Natrzasłi
Robòtë? Aha, në jo, prôwda, prôwda. Sadnie so, jo. Zaczniemë òd kwesto… kwesto…
(jikô sã ni mògąc wëmówic słowa)

Grażina Kùlke
(rozzérô sã wkół)
Jaczi kwestë? Móm co płacëc?

Sztefón Natrzasłi
Kwestonariusza. Dóné spiszemë. Miono?

Grażina Kùlke
(wachlëjąc rzãsama z bùchą gôdô)
Grażina – jak ù Mickewicza.

Sztefón Natrzasłi
(klepie na maszinie)
Miono: Grażina, nôzwëskò: Mickewicz.

Grażina Kùlke
Kùlke.

Sztefón Natrzasłi
Rozmiejã. Mickewicz-Kùlke.

Grażina Kùlke
Nié! Kùlke.
(lëtrëje)
K jak Kònke, ù jak Ùlenberg, l jak Lës, k jak Kònkòl, e jak Ellwart!

Sztefón Natrzasłi
Móm je wszëtczé pisac?

Grażina Kùlke
Co?

Sztefón Natrzasłi
Jak co? Ne wszëtczé nôzwëska.

Grażina Kùlke
Doch móm le jedno: Kùlke.

Sztefón Natrzasłi
(wëriwô kôrtkã z maszinë)
Mariczënë bùksë jo! Zaczniemë jesz rôz. Miono?

Grażina Kùlke
Grażina, jô doch gôdała.

Sztefón Natrzasłi
Nôzwëskò?

Grażina Kùlke
(nerwòwò rikô)
Kùlke, Kùlke, Kùlke, Kùlke a jesz rôz Kùlke! Kùlke Grażina!

Sztefón Natrzasłi

Nié tak flot, jô doch ni mògã sfórtowac
(sapiącë chùtkò klepie na maszinie)
Jak je stôrô?

Grażina Kùlke
(bùszno)
Tak stôrô, jak wëzdrzã.

Sztefón Natrzasłi
(zdrzi na białkã)
Kò dobrze, wpiszã na òkò – 60. Dze mieszkô?

Grażina Kùlke
W Stôri Babie, szasé Wrëkòwô 158 łómóné na B.

Sztefón Natrzasłi
(pò cëchù smiejącë sã)
Ha, ha, stôrô baba ze Stôri Babë… Jô to móm miarã w òkù.
(głosno)
Jaczi mô fach?

Grażina Kùlke
Jem historiczką.

Sztefón Natrzasłi
Histericzką? To bë sã nawetka zgôdzało…

Grażina Kùlke
(nerwés)
Nié histericzką, leno historiczką. Szkólną òd historie.

Sztefón Natrzasłi
Czemù ju nie ùczi?

Grażina Kùlk
(płaczącô)
To za długô historiô…

Sztefón Natrzasłi
Dobrze ju dobrze. Co bë chca robic?

Grażina Kùlke
Nôlepi cos w mòjim fachù. Mùszita wiedzec, że jô dogłãbno historiã znajã
(wëpinô slôdk).

Sztefón Natrzasłi
(wëcygô baro grëbi hëft)
Òbezdrzimë. Co më tu mómë. Hmmm, wiele tegò nie je. Ò móm! To bë bëło cos dlô waju. Na swiéżim lëfce lubi bëc?

Grażina Kùlke
Jo, baro lubiã!
(pòetickò)
A nôlepi jô bë całé żëcy w parkù sedzała, szpacérowa midzë drzéwiãtama, na łôwce sedzała, jak ptôszczi spiéwają słëchała, słunuszka parmiénie chwëtała…

Sztefón Natrzasłi
A w zemi grzebac? Na przikłôd w ògródkù szpôdlã kòpac?

Grażina Kùlke
(pòkazëje mùskle)
Kraft to jô móm. Czedë je trzeba, tedë nié blós ògródk skòpiã.

Sztefón Natrzasłi
Fëjn…
(wëcygô kôrtkã z maszinë, sztãplëje, pòdpisëje a pòdôwô białce)
Tu je sczerowanié na smãtôrz.

Grażina Kùlke
Co? Dze? Jô doch jem za młodô.

Sztefón Natrzasłi
Nie bòji sã, na smãtôrz… do robòtë. Tam prawie kòpikùlczi brëkùją.

Grażina Kùlke
Co? Czegò? Kògò?

Sztefón Natrzasłi
Kòpikùlczi…, taczégò co kùle kòpie.
(widzy, że białka nie rozmieje)
Jenkù jo – grabarza jima trzeba.

Grażina Kùlke
Co, jô móm za kòpikùlkã robic?

Sztefón Natrzasłi
Czemù nié? Zgódno z kwalifikacjama. Swiéżi lëft lubice, w parkù wa bë całé żëcé sedzała, szpôdlã robic rozmiejece, masyw wëzdrzice, mòc môta. Do te jesz waji nôzwëskò – Kùlke riichtisz do smãtôrza pasëje…

Grażina Kùlke
Ale jô jem historiczką!

Sztefón Natrzasłi
A smãtôrz to co? Sama gôdała, że historiã dogłãbno znaje,
(pòdnôszô pôlc do górë)

a w ti robòce mòże ją jesz pògłãbic. Przecã na smãtôrzu są historiczné nôgrobczi, historiczné zarczi, historiczné gnôtë, historiczné czaszczi tam są, czë nié? Kùli tam historii w zemi leżi. Leno szpôdlã wzyc a ją òdkòpac. Në pòtemù zôs mùszi ją zakòpac, ale tu ju jinô historiô…

Grażina Kùlke
Ale jô móm trupów strach!

Sztefón Natrzasłi
Zdrzëta lëdze. Takô stôrô, na smãtôrzu ju jedną szpérą stoji, a trupów sã bòji! Zresztą, w wajim wiekù to ju sã mùszi pòmalinkù do zemi przënãcac. Tu je sczerowanié bez òdwòłaniô! Dożëwòcé.

Sztefón Natrzasłi
(wstôwô a wòłô)
Józy, pòj.

Wchôdô Józy òblokłi w gùmòfilce, kùfajkã, beret na głowie.

Sztefón Natrzasłi
Tu môsz nową kòpikùlkã.

Józy Treëma
(òbzérô jã z górë w dół)
To doch je baba!

Sztefón Natrzasłi
Baba nié baba, ale jaczé mô kwalifikacje! Nôzwëskò, szpecjalisticzné wësztôłcenié, wiek – lepszi kòpikùlczi nie nalézesz.
(sôdô na stółkù a òtmikô gazétã).

Józy Trëma
(scygô beret a kùszkô Grażinã w rãkã)
Józy Trëma jem. Tej jidzemë.

Grażina Kùlke
(trzimiącë sã biórka wrzeszczi)
Nigdze nie pùdã!

Józy Trëma
(pòdôwô ji różk z tobaką)
Wez dopalacza na òdwôgã, a pòj.

Grażina Kùlke
(wcygô fëst priz i szerok sã ùsmiéchô)
Kò dobrze ju jidã. Przënômni na tim smãtôrzu taczégò trzôskù, jak w szkòle nie mdze.

Józy Trëma
(machając do òbzérników szpôdlã)
A wa co? Wa sã tak nie smiejta. Ë z wama më sã rëchli czë pózni spòtkómë… na smãt… to je w Ùrzãdze Robòtë.