Reklama

Ùkrôdł taszã z carsczim jajã

Klëka

12/04/2026 17:14

Òdj. Stan Shebs; zdrzódło: https://pl.wikipedia.org/wiki/Jaja_Faberg%C3%A9#/media/Plik:Memory_of_Azov_Egg.jpg

Sprôwca baro sã zmilił, czej mëslôł że laptop i kreditowé kartë to nôdrogszé, co bëło w taszë. Na narkòticzi wëmienił jistny skôrb.

W Londinie skôzelë na dwa lata i trzë miesące sôdzë Enzo Conticellégò, sprôwcã kradélstwa białczëny taszë ze smùtana dwa tësące dwadzestégò czwiôrtégò rokù. Jak przedstawiła gò na rozprawie broniszka, Conticello robił czédës za kùcharzã, stracył robòtã òb czas pandemie, a pòtemù ùzanôleżnił sã òd kòkainë. Czej béł w jednym z pubów, piérwi próbòwôł zabrac taszã jinszi persónë, ale to mù sã nie ùdało, bò òna wëszła. Dôł sã tej na taszã bismónczi Rosie Dawson i tą razą mù sã ùdało. W westrzódkù bëło zdobné jajo, czile zédżerków, laptop i kreditowé kartë. Taszã przehamstrowôł na narkòticzi, jednã kartã sobie òstawił i wpôdł, czej próbòwôł ji ùżëc. Ni miôł swiądë, że ze wszëtczégò nôdrogszé bëłë zédżerczi ë jastrowô zdoba. Bëło to jedno z jôj Fabregé'a – złotnika, jaczi robił darënkòwé jastrowé jaja dlô rusczich carów. Wôrtnosc taczich zdobów to nawet pò czile miliónów dolarów, a na całim swiece ùchòwało sã jich niewiele. No ùkradzoné bëło z òsmënôscekaratowégò złota i miało sto sztërë diamentë a téż nieszlifòwóny szmarôgd z Zambie. Produkcje Fabregé'a bëłë téż drodżé zédżerczi. Ùbezpieczeniowô firma za stratã wëpłacëła sto szesc tësący sétmëset fùntów robòtnikóm Rosie Dawson w Craft Irish Whiskey Company. Białka miała te skarbë w taszë wzãté z wëstôwkù, bò chcała je pòkazac na firmòwim pòtkanim. Do dzys pòlicjô jich nie nalazła, ale dali za nima szukô.

H.S.Sz.

Źródło i opracowanie własne