Reklama

Gambiô wëbrała specjalnégò prokùratora

Klëka

09/04/2026 15:19

Yahya Jammeh. Òdj. https://pl.wikipedia.org/wiki/Yahya_Jammeh#/media/Plik:Yahya_Jammeh.png

Chòc ùszłi prezydent Yahya Jammeh sedzy na wënëkanim i nie wespółrobi z ternym gambijsczim rządã, w kraju wcyg je wiele lëdzy żdżącëch na swòje procesë w sprawie ùstëgòwaniów za rządów Jammeha.

Gambiô wëbrała człowieka do pòprowadzeniô procesu procëm winnym łómaniô prôw człowieka za rządów prezydenta Yahyi Jammeha. Przejimnął włôdzã w pùczu w tësąc dzewiãcset dzewiãcdzesątim czwiôrtim rokù. Pózdni ùcwierdzył jã dobëcama w prezydencczich welacjach. Dochôdało tedë do stëgòwaniów, znikniãców i mòrdarstwów z rãk służbów bezpiekù. Czej przerżnął welacje w dwa tësące sétmënôstim rokù, nie ùznôł jich wëników. Wëjachôł równak z kraju pò zbrojny interwencje krajów Gòspòdarczi Pòspólnotë Państwów Zôpadny Africzi, a dzys je na wënëkanim w Równikòwi Gwineji. Za nowégò prezydenta Adama Barrowa zaczãła w Gambie dzejac Kòmisjô Prôwdë, Ùjednaniô i Òdszkòdowaniów, jakô dzãka zeznanióm òfiarów, cemiãżców i swiôdków reżimù òbrobiła rapòrt przedstawiony prezydentowi piãc lat nazôd. Terô procesama procëm winnym stëgòwaniów zajic mô sã britijsczi prawnik Martin Hackett. Rząd gò wëbrôł spòmidzë wiele jinëch kandidatów dzãka jegò doswiôdczeniémù. Hackett béł w Specjalnym Tribùnale Òrganizacje Zjednónëch Nôrodów dlô Libanu a téż przesłëchiwôł wòjnowëch zbrodniarzów z wòjnë w Kòsowie. Gambiô ùsadzëła dlô niegò ùrząd Specjalnégò Prokùratora. Przed nim rozsądzanié w zbrodniach z dwadzesce dwùch lat rządów Yahyi Jammeha.

H.S.Sz.

Źródło i opracowanie własne