Reklama

Wôłk na szasëjach Kartuz

Klëka

09/04/2026 15:46

Pòzdrzatkòwi òdjimk. Òdj. Chris Muiden; zdrzódło: https://pl.wikipedia.org/wiki/Wilk_szary#/media/Plik:Canis_lupus_265b.jpg

To pierszi taczi przëtrôfk, jak wôłka chtos nagrôł w samim gardze. Nadlesyństwò rzecze, że mòże to sã zdarzac czãscy.

Kòl drëdżi w nocë w niedzelã piątégò łżëkwiata jeden czerowca jachôł przez Kartuzë. Zmerkôł i nagrôł zwierzã, jaczé biegło szasëjama Herojów Westerplatte i Prokòwską. Na nagranim dobrze widzec, że béł to wôłk. Nadlesyństwò Kartuzë i Miesczi Ùrząd w Kartuzach dostałë ò tim do wiadë. Ùrząd przekôzôł, że to pierszi przëtrôfk, jak wôłk béł widzóny w samim gardze i tak krótkò chëczi, bò dotąd biwało tak leno na wsach. Nadlesyństwò pòcwierdzëło, że na nagranim je widzec młodégò wôłka. Ten gwës òdparłãcził sã òd swòjégò karna i rëgnął w szëkbie za teritorium. Mógł próbòwac przéńc z jednégò dzélu lasu do drëdżégò, a że Kartuzë są ze wszëtczich starnów òbtoczoné lasã, zabłądzył w miesce. Macéj Môrcëniôk z nadlesyństwa gôdô, że taczich przëtrôfków mòże bëc wicy ë mieszkańcë Kartuz jak nôbarżi mògą sã spòdzewac wizytów tëch zwierzãt krótkò chëczi. Dlôte wëszëznë przestrzégają przed òstawianim na noc psów bùten a téż spùszczanim jich z tidrów krótkò lasu. Nie słëchô sã téż òstawiac bùten psowi abò kòcy charnë w placach przëstãpnëch dlô rabùsznëch zwierzãt, bò tedë òne mògą sã barżi zainteresowac chëczą ë ji òkòlim. Jeżlë wôłczi w Kartuzach bãdą sprôwiałë wikszé jiwrë abò bãdze jich òsoblëwie wiele, Miesczi Ùrząd mòże prosëc Regionalną Direkcjã Òchronë Strzodowiszcza ò zgòdã na jich płoszenié. Dlôte wôrt dawac znac Ùrzãdowi ò kòżdim zmerkónym wôłkù krótkò chëczi.

H.S.Sz.

Źródło i opracowanie własne