Reklama

MÒKRÉ NÓTË - dlô dzôtków

Bëlôk - czôrno na biôlim

27/03/2026 15:53

Mòkré nótë

Didżej Roda* włoża nëbã
Mòkré nótë pùszczô z nieba
Westrzód szëmù, łisków, rików
Pòd batutą mô mùzyków:

Ref. Deszcz bãblëje ò parapet – kap-kap-kap
W piéckù gwiżdże dzëwi wiater – fiu-fiu-fiu
Grzëmòt żdaje na wéńdzenié – mrëk-mrëk-mrëk
Chce miec mòcné ùderzenié – bum!

Trio z blónów mòckò graje
Nijak lëdzóm spac nie daje
W stôri chëczi diskòtéka
Straszną w jizbi czëc mùzykã:

Ref. Deszcz bãblëje ò parapet…

Niglë cemnosc rozwidniała
Stôrô chëcza zadrëżała!
Łiskawica zatuńcowa
Rësza cénie, a tej znowa:

Reklama

Ref. Deszcz bãblëje ò parapet…

Wespół chùrã, w takt mùzyczi
Czëc są w chëczi dzecy krziczi
Piszczą, rëczą, lameńtëją
Pòd pierzënë głowë krëją…

Ref. Deszcz bãblëje ò parapet…

Didżej Roda scygnã nëbã
Pònëkała grôjków z nieba
Spią dzecątka ùmãczoné
Nocnym granim nawieloné

Stołowé, 7 zélnika 2016 r.

Tekst nen dobél I plac w pierszi edicje kònkùrsu na tekst piesni dlô dzecy m. Jana Trepczika (2016 r.), rëchtowónégò bez Mùzeùm Kaszëbskò-Pòmòrsczi Pismieniznë i Mùzyczi we Wejrowie

Reklama

* Didżej Roda - Nënka Roda (Matka Natura). Czej widzysz jã na òdjimkù - môsz wiôlgą wëòbrazniã!

Źródło i opracowanie własne