Reklama

Co? Dze? Czedë? [8-9.05]

Kùltura

07/05/2026 11:03

9 maja ò gòdzënie 11 dp. w Mùzeum - Kaszëbsczim Etnograficznym Parkù we Wdzydzach bãdze pierszô architektoniczno-kònserwatorskô szpacéra. Je òna rëchtowónô, cobë achtnąc 120 lat jistnieniô skansenu. Na tim wëdarzenim mdze mòżna dokładno pòznac wiele drobnotów zrzeszonëch z tradicyjną bùdowizną Kaszëb, Kòcewiô i Bòrów. Mùsz sã zapisac rëchli w mùzeùm, biliet przińdze 40 zł, równak profesjonalnô i rzôdkô mòżebnosc tak dokładnégò zwiedzeniô Skansenu we Wdzydzach je wôrt kòżdëch dëtków.

Do 8 maja mòżna sã zgłaszac na XVI Kaszëbsczi Festiwal Pòlsczich i Kaszëbsczich Hitów, jaczi bãdze jak wiedno w Lëpińcach. Je to jeden z ùlubionëch kònkùrsów szkólôków z Kaszëb. Kòżdégò rokù mòżna pòtkac wiele młodëch znającëch kaszëbsczi jãzëk, jaczi dolmaczą znóné wszëtczim frantówczi na kaszëbsczi. Fòrmùła je baro atrakcyjnô dlô młodzëznë, bò widzą, że Kaszëbskô je dzélã swiatowi kùlturë. Je to kònkùrs pòd patronatã Kùratorium Pòùczënë we Gduńskù. Je to wôżné, bò placë zajãté na tim kònkùrsu są rechòwóné do pùnktacje w rekrutacji do szkòłów i do samòrządowëch sztipendiów. Festiwal bãdze 22 maja.

Reklama

8 maja w Wòjewódzczi i Gardowi Pùbliczny Biblotece we Gduńskù (Targ Rakowy 5/6) na drëdżim szosu w salë 218 bãdze aùtorsczé pòtkanié z Jacekã Hinze, aùtorã ksążczi Wyspa nie z tego świata. Jidze ò Hajiti, òstrów dosc cëzy dlô naju. Je to bëlnô leżnosc, cobë pòznac Hajiti òd kògòs, co dokładno pòznôł zwëczi, kùlturã, realia i codniowé żëcé mieszkańców tegò òstrowù.