Nigel Farage procëm grôfòwi z kòsmòsu

We czwiôrtkòwi pòdrëchlony welacje do Jizbë Gminów w Clacton-on-Sea nôwikszé szanse na mandat mielë Nigel Farage i Grôf Smietnikògłowa.

Na zôczątkù lëpińca britijsczi pòlitik Nigel Farage, przédnik dalekprawiznowi Partie Refòrmów, zrezygnowôł z mandatu do Jizbë Gminów z òkrãgù Clacton-on-Sea w pôłniowi Anielsce. Stało sã to pò òbwinach ò przëjimanié przez niegò niezaregistrowónëch darowiznów w dëtkach. Dôł sã równak wëstãpic w pòdrëchlonëch welacjach w òkrãgù, żebë òczëscëc swòje miono. Nôwikszé procëmné partie pòzwałë jegò zachòwanié pòliticznym widzawiszczã i swòjich kandidatów nie wëstawiłë. Na jich plac weszedł znóny ju w britijsczi pòlitice Count Binface, to znaczi Grôf Smietnikògãba – midzëgalakticzny kòsmiczny biôtkòwnik ze smietnikã na głowie. Ta pòstacjô stwòrzonô przez satirika Jona Harveya to nastãpnik Lorda Bucketheada – Pana Kòszogłowë – chtëren pòjawił sã na pòliticzny binie dzewiãc lat nazôd. Jakno te pòstacje Harvey stôwôł do biôtczi w welacjach do parlamentu, a dwa razë jakno kandidat na bùrméstra Londinu. W welacjach w Clacton-on-Sea kùreszce dało trzëdzescë kandidatów, ale pò wëcopanim sã nôwikszich partiów przédnym procëmnikã Nigela Farage stôł sã prawie Grôf Smietnikògłowa. W jegò programie bëło midzë jinszima zakôzanié znôwnégò startu w welacjach kandidatóm, jaczi ùstąpilë w westrzódkù kadencje, a téż nieprzëjãcé piãc miliónów fùntów w kriptowalutach, tak jak zrobił to Farage. Òbiécôł téż wëstãpic za rok na Eùrowizje, ùpaństwòwic spiéwôczkã Adele, a téż pòwikszëc przédné dwiérze do bùdinkù parlamentu, żebë mòc tam wlezc ze swòją wiôlgą głową. Pòpiarcé dostôł midzë jinszima òd premiérë Keira Starmera, jaczi ùstąpił w lëpińcu, a téż jegò nastãpnika i ternégò premiérë Andégò Burnhama. Welacje bëłë we czwiôrtk trzënôstégò zélnika, a dobéł w nich – wedle przewidiwaniów – Nigel Farage, zwëskiwającë szescdzesąt trzë i trzëdzescë sztërë dzesątëch procenta głosów. Za nim béł prawie Smietnikògłowa, ten miôł dwadzesce szesc i dzewiãcdzesąt trzë dzesąté procenta. To nôwikszi wënik w kariérze kòsmicznégò biôtkòwnika.

H.S.Sz.