Reklama

Pòdpłacył chłopa, żebë swiôdcził procëm sobie

Klëka

14/02/2026 14:58

Wizjô sztrôfë za nieùdzelenié pòmòcë jinym szoféróm sprawiła, że przëszłi na pòlicjã chłop dorazu zmienił zeznania.

W gminie Céwice we czwiôrtk dwanôstégò gromicznika kòl sódmi reno na drodze midzë Pòpòwã a Dzechnã zderzëłë sã trzë aùtołë. Jeden czerowca aùtoła kia jachôł za chùtkò na slësczi drodze i wjachôł w daciã, jakô jachała naprocëm, a tej w tił dacii grzimnął jadący za nią òpel. Czerowca òpla nie zatrzimôł sã, nie pòmógł jinszim czerowcóm, a na placu òstała jegò registracjowô tôfla. Zaòstałi szoférzë trafilë do bòlëcë, le jich żëcé nie bëło w zagrôżbie. Pòlicjô zabezpieczëła zgùbioną tôflã òd òpla i pò ni doznelë sã, chto je miéwcą wòzu. Za dwie gòdzënë w Krézowi Kòmendze Pòlicje w Lãbòrgù zgłosył sã sztërdzescë dzewiãc lat stôri chłop, jaczi pòwiedzôł, że to òn w sztóce wëpôdkù czerowôł òplã. Czedë szandarzë rzeklë mù ò sztrôfach, jaczé grożą za nieùdzelenié pòmòcë, chùtkò zaprzékòwôł swòji winie. Przëznôł, że prôwdzëwi czerowca zapłacył mù dwasta złotëch za to, żebë pòszedł na pòlicjã i sã przëznôł. Wskôzôł téż, gdze gò nalézą. Pòlicjô trafiła trzëdzescë szesc latnégò mieszkańca Lãbòrga. Béł trzézwi, ale ni miôł ùprawnieniów do czerowaniô aùtołã. Béł téż szukóny przez lãbòrsczi Rejonowi Sąd za jinszą przesprawã. Terô òdpòwié za prowadzenié wòzu bez ùprawnieniów, zjiscenié zagrôżbë w lądowi rësznocë, nieùdzelenié pòmòcë ùczãstnikóm wëpôdkù a téż twòrzenié falszewëch dokazów żebë ùniknąc òdpòwiedzalnotë. Za to mòże dostac piãc lat sztrôfë, wësoką dëtkòwą sztrôfã i zôkôz czerowaniô.

H.S.Sz.

Źródło i opracowanie własne