Méstrowie czëtaniô pò kaszëbskù

Przedstôwcowie 11 kaszëbsczich pòwiatów i gòsce zeza grańcë Kaszëb przëjachelë 12 gòdnika do Mùzeùm Kaszëbskò-Pòmòrsczi Pismieniznë i Mùzyczi we Wejrowie, dze wzãlë ùdzél w kònkùrsu Méster Bëlnégò Czëtaniô.

Ùczniowie klas I-II czëtelë "Wiérztë starka dlô dzôtk" Jana Trepczika. Dobiwcama òstelë: 1. Marcelina Etmańskô (Zrzesz Szkòłów w Skòrzewie), 2. Alina Abramòwskô (Sp.Sz. nr 6 w Kòscérznie), 3. Stanisłôw Zmùda Trzebiatowsczi (Zrzesz Szkòłów w Szlachecczim Brzéznie). Wëprzédnienia dostelë: Natasza Mëszka (Sp. Sz. nr 7 w Chònicach) i Joana Roda (Sp. Sz. w Czãstkòwie).

Ùczniowie kl. III-IV mielë do czëtaniô wëjimczi z ksążczi Danutë Stanulewicz "Zelony pùjk". Dobiwcama òstelë:

1. Klara Makùrôt (Sp.Sz. nr 4 w Kòscérznie), 2. Milena Pranszke (Szkòłowò-Przedszkòłowô Zrzesz w Szëmôłdze), 3. Zuzana Lubeckô (Szkòłowò-Przedszkòłowô Zrzesz nr 3 w Kòscérznie). Wëprzédniony òstelë: Marcel Karczewsczi (Sp. Sz. we Wiôldżim Bòżépòlu) i Liliana Pilarskô (Sp. Sz. w Swôrzewie).

W kategórie kl. V-VI ùczãstnicë czëtelë wëjimczi ksążczi Anë Glëszczińsczi ò przigòdach Bëtka w dôwnym Bëtowie. Dobiwcama òstelë: 1. Nela Kòtulskô (Spòlëznowô Sp. Sz. Dobrzewino–Karczemczi), 2. Jadwiga Bòbkòwskô (Sp. Sz. w Kaliszu), 3. Aleksander Gajãcczi (Sp. Sz. w Kalëskach), wëprzédnienia: Agata Piekarskô (Sp. Sz. w Mirochòwie) i Klara Walkùsz (Sp. Sz. w Łebùnie).

Na młodzëznã z klasów VII-VIII żdałë wëjimczi z "Przigód Remùsa" Aleksandrë i Darka Majkòwsczich. Dobiwcama òstelë:

1. Nataliô Swiątk-Brzezyńskô (Zrzesz Szkòłów w Szlachecczim Brzéznie), 2. Michalina Marcyńskô (Sp. Sz. w Chmielnie), 3. Mikòłôj Drewczińsczi (Zrzesz Szkòłów w Skòrzewie), wëprzédnienia: Juliô Szënszeckô (Sp. Sz. w Swôrzewie) i Klaùdiô Bienias (Sp. Sz. w Szczenurzim).

Ùczniowie wëżispòdlecznëch szkòłów szlë na miónczi z "Pòd òkã Jastrë" Darka Majkòwsczégò. Dobiwcama òstelë:

1. Zofiô Drewczińskô (Zrzesz Szkòłów w Skòrzewie), 2. Michôł Mòga (II ÒL w Chònicach), 3. Paweł Wòrek (PCKZiÙ), wëprzédnienia: Bartosz Gòlińsczi (Katolëcczé ÒL w Chònicach), Béata Pùzdrowskô (Gduńsczé Aùtonomiczné Liceùm), Maja Turzińskô (I ÒL w Bëtowie).

Westrzód dozdrzeniałëch, chtërny czëtelë wëjimczi ksążczi "Jak planétë wkół Słuńca", dobéł Krësztôf Rôdtka (pùcczi kréz), drëgô bëła Aniela Makùrôt (kòscersczi kréz), trzecô Marta Majewskô (Gdiniô), a wëprzédnienia dostelë: Brunon Król (Gdiniô) i Stanisłôw Bùdzysz (pùcczi kréz).

W kategórie lëdzy warkòwò zajimającëch sã kaszëbizną dobëła Karolëna Serkòwskô-Secechòwskô przed Piotrã Kòwalewsczim (òbëdwaji z kartësczégò pòwiatu), trzecy béł Szëmón Heland (pùcczi kréz), a wëprzédniony òstelë: Paùel Wittbrodt (Gdiniô) i Henrika Albeckô (wejrowsczi kréz). Czëtelë ksążkã "Wùnderwaffe i jinszé Fef-Lotë" Słôwka Fòrmellë.

Nôdgrodë w latosy edicje kònkùrsu fùndowelë: MKPPiM, Wëdôwizna, Kaszëbskò-Pòmòrsczé Zrzeszenié, Kaszëbsczi Institut i Kaszëbsczé Mùzeùm w Kartuzach.

Bóg zapłac MPiMKP, szkólnym i ùczãstnikóm za to pòspólné swiãto kaszëbiznë!