Reklama

Wiôldżé òdemkniãcé Targòwi Halë

Klëka

11/08/2026 11:02

Òdj. z facebookòwi starnë Hala Targowa Gdańsk

Sto trzëdzestô roczëzna pòstawieniô halë zacznie sã we strzodã pòkôzkã kaszëbsczi kùchnie. Fejrowanié bãdze sã cygło jaż do niedzelë.

Ju we strzodã dwanôstégò zélnika nazôd òdemkną Targòwą Halã we Gduńskù. Bëła na czilenôsce miesący zamkłô i rëchtowónô na zaczãcé nowégò etapù swòjégò dzejaniô – jakno plac gastronomie, kùpiszów i zetkaniów. Na trzech kòndignacjach halë dzejac mają trzëdzescë sztërë gastronomiczné ë hańdlowé pùnktë. Na przãtrze bãdą restaùracje z kelnérama, na parterze street food i kùlturalné wëdarzenia, a w sklepie krómë i cona barżi kameralnëch zetkaniów. Rewitalizacjô òbiektu òbjimała téż òdtwòrzenié a wëekspònowanié historicznëch wôrtnotów. Òbjimac to téż mô dobiér wëstôwców – zgódno z nową deją cësk mô bëc pòłożony na rzemiãsniczą estetikã i swiéżé produktë òd lokalnëch dotëgòwiwôczów. W dzéń òdemkniãcô bãdze pòkôzk warzeniô na żëwò. Kùcharze Juliô Cëchòckô i David Gaboriaud zaprezentérëją kùchniã kaszëbską i francëską a téż jinszé z wëzwëskanim kaszëbsczich produktów. W halë równak i w pòstãpné dni dérowało bãdze fejrowanié znôwnégò òdemkniãcô. We czwiôrtk mdze kòncert ùsôdzków dżezowégò artistë Michała Ùrbaniôka, a na Dominikańsczim Placu pò pòkôzanim paragònu z Targòwi Halë bãdze szło dostac za darmôkã kòszëlkã, torbã abò czôpkã z mòżebnoscą personalizacje. W piątk zòrganizëją w halë silent disco – rozegracjã, gdze mùzyka graje blós na słëchùlkach rozdôwónëch kòżdémù ùczãstnikòwi. Na sobòtã i niedzelã pòmëslóné są pòstãpné mùzyczné kòncertë. Rozegracje ùczestniwają nié leno samò òdemkniãcé, ale téz sto trzëdzestą roczëznã pòstawieniô bùdinkù.

H.S.Sz.

Źródło i opracowanie własne