Chcą Amerikanie wzyc Grenlandiã sëłą?

Pò atakù na Wenezuelã znajarzóm geòpòliticzi drãgò wëzgadnąc pòstãpné rëchë Trumpa, jaczi ò aneksje Grenlandie gôdô òd dôwna.

Pò slédnëch corôz czãstszich wëpòwiescach prezydenta Zjednónëch Stanów Donalda Trumpa i jegò przëstojników ùrosło zbòjanié ò przińdnotã Grenlandie. Trump gôdô ò tim, że ji teritorium je brëkòwné Stanóm. Strzód repùblikanów dało głosë ò tim, że ji włączenié do Stanów miałobë sã stac jednym z célów òficjalny zagrańczny pòliticzi. Dorôdca prezydenta Stephen Miller w wëdowiédzë spitóny ò mòżebnosc ùżëcô wòjska do przejimniãcô kòntrolë nad òstrowã scwierdzył, że nicht nie bãdze sã ze Stanama ò przińdnotã Grenlandie bił, a téż, że w swiece, w jaczim żëjemë, rządzy równak sëła. Słowa Millera na spòlëznowëch mediach skòmentérowôł ùszłi premiéra i szef dyplomacje Szwédzczi Carl Bildt, jaczi napisôł, że mòże sã spòdzewac ùżëcô przez Amerikã òstri sëłë przez nôblëższé pół rokù, a Eùropa miałabë stanąc w pòszëkù i zaladowac barniã na kònfrontacjã ze Stanama w sprawie Grenlandie. W òdpòwiescë na pòstawã Amerikanów jinszi eùropejsczi wódcë wëdelë we wtórk szóstégò stëcznika pòspólné òswiôdczenié òb czas dérëjącégò w Parizu szczitu. Napiselë w nim, że bezpiek Arkticzi òstôwô dlô Eùropë i Nordowòatlanticczi Zdrëszënë prioritetã i dlôte w dogôdanim z nima mùszi bëc zagwësniwónô òbarna ti òbéńdë. Pòcwierdzëlë téż, że prawò do pòdjimaniô decyzjów ò przińdnoce Królestwa Duńsczi i Grenlandie jakno jegò partu słëchô leno Duńsce i Grenlandie. Pòdpiselë sã pòd tim premiérzë  Italsczi, Pòlsczi, Szpańsczi, Wiôldżi Britanie i Duńsczi, kanclérz Niemiecczi a téż prezydent Francje. Za òswiôdczenié pòdzãkòwôł wódcóm premiéra Grenlandie Jens Frederik Nielsen, chtëren téż wëdôł wezwã do Amerikanów ò dialóg z Grenlandią.

H.S.Sz.